Міністэрства антыманапольнага рэгулявання і гандлю зацвердзіла інструкцыю аб методыцы разліку гранічных адпускных цэн вытворцаў на лекавыя сродкі. Гэта прадугледжана пастановай МАРГ нумар 83 ад 19 лістапада 2018 года, якая апублікавана на Нацыянальным прававым інтэрнэт-партале, паведамляе БЕЛТА.

У аснове інструкцыі - прынцып рэферэнтнага цэнаўтварэння, гэта значыць, параўнання цэн вытворцаў у краінах з падобнымі сацыяльна-эканамічнымі паказчыкамі.

Пастанова ўступае ў сілу пасля афіцыйнага апублікавання і дзейнічае да 31 снежня 2020 года.

Як паведамлялася, з 1 студзеня 2019 года замежным і айчынным вытворцам трэба будзе рэгістраваць гранічныя адпускныя цэны на некаторыя лякарствы. Новыя правілы распаўсюджваюцца на 37 міжнародных непатэнтаваных найменняў лекавых сродкаў для лячэння сардэчна-сасудзістых і анкалагічных захворванняў пры іх абарачэнні на тэрыторыі Беларусі.