У Беларусі 93 працэнты сельскагаспадарчай тэхнікі гатова да пасяўной кампаніі, паведаміў журналістам міністр сельскай гаспадаркі і харчавання Іван Крупко, перадае карэспандэнт БЕЛТА.

"Сёння ў краіне стартуе пасяўная кампанія, і фактычна ўся тэхніка, а гэта 93 працэнты, гатова да пасяўной. Думаю, што з кожным днём гатоўнасць сельгастэхнікі будзе павялічвацца. Да таго ж перад галіной была пастаўлена канкрэтная задача выкарыстоўваць якасную энерганасычаную тэхніку і машынатрактары, якія прадпрыемствы атрымалі ў лізінг. Службам Дзяржтэхнагляду раёнаў у сваю чаргу трэба разам выбудаваць работу па рамонце і прапрацаваць якасныя падыходы да захоўвання, утрымання і эксплуатацыі тэхнікі. Думаю, мы выбудуем гэту работу з раёнамі і абласцямі", - адзначыў кіраўнік ведамства.

Міністр звярнуў увагу і на пытанне забеспячэння гаспадарак угнаеннямі, насенным матэрыялам і палівам. Паводле яго слоў, падрыхтавана ўжо дастатковая колькасць паліва, каб ва ўстаноўленыя тэрміны правесці пасяўную кампанію.

Іван Крупко спыніўся таксама на праблеме падзяжу буйной рагатай жывёлы. "Нам трэба разабрацца з падзяжом жывёлы, і гэта пытанне стаіць вельмі сур'ёзна, - сказаў ён. - Ужо зрухі па выніках месяца ёсць, змяншаецца працэнт загінулай жывёлы. Гэта задача адзіная для ўсіх. Думаю, у бліжэйшы час убачым сур'ёзныя змяненні ў лепшы бок і ў гэтым напрамку".