Стаць бліжэй да кліентаў
Указам кіраўніка дзяржавы Дзень банкаўскіх і фінансавых работнікаў прыпадае на першую нядзелю студзеня, сёлета — пятага студзеня. Свята прымеркавана да пачатку дзейнасці Беларускай канторы Дзяржаўнага банка БССР у 1922 годзе.
Гутарым з дырэктарам Цэнтра банкаўскіх паслуг №211 філіяла №216 г. Полацка ААТ “ААБ “Беларусбанк” Таццянай Курто.
— На вялікі жаль, сёння мала вядома інфармацыі пра даваенную дзейнасць
Лепельскай цэнтральнай дзяржаўнай працоўнай ашчаднай касы — так поўна і правільна
называлася раённае аддзяленне галоўнага банка рэспублікі. Аднавілася ж
дзейнасць касы амаль адразу пасля вызвалення раёна ад нямецка-фашысцкіх
захопнікаў. Летам 1944 года першай савецкай установай, якая пачала дзейнасць,
стаў ваенны камісарыят, які праводзіў прызыў новага папаўнення ў Чырвоную
армію. Затым адкрыліся аддзяленні ашчаднай касы, бо ў першую чаргу трэба было
наладжваць эканоміку, людзям трэба было налічваць і рабіць выплаты. Першым
дырэктарам аддзялення ашчаднай касы быў Самуіл Зялёнка, які адпрацаваў да 1963
года. Затым яго змяніў Фёдар Яско, які працаваў з 1963 па 1985 гады, Сцяпан
Церашкоў кіраваў у 1985 — 1988 гадах, Іна Буйневіч — у 1988 — 2000 гадах. З
2000 па 2009 гады Цэнтрам банкаўскіх паслуг №211 кіравала Людміла Місюра. З 2009
года ўстановай кірую я.
— Вядома, што гонар кожнай установы — яе ветэраны…
— Адной з маіх настаўніц у прафесіі была Зінаіда Рутэнка, якая аддала працы ў
банкаўскай сістэме больш за 30 гадоў і была ўдастоена высокага звання “Выдатнік
ашчадбанка”. У нашай галіне гэта высокая ўзнагарода. Увогуле ж у нас вялікая
ветэранская арганізацыя, у якой налічваецца 38 чалавек. Ёй кіруе Людміла
Місюра. Пра сваіх ветэранаў мы не забываем, абавязкова віншуем на свята і
імкнёмся дапамагаць у розных сітуацыях па меры сіл.
— Перад пачаткам нашага інтэрв’ю наведаў аперацыйную залу Цэнтра банкаўскіх
паслуг, паглядзеў у кабінеты — усюды жанчыны. Значыць, банкір — жаночая
прафесія. Чаму так?
— Шчыра прызнаюся, дакладна не ведаю. Памятаю, яшчэ ў савецкі час у вышэйшых
навучальных установах народнай гаспадаркі спецыяльнасці эканамістаў,
бухгалтараў, аснову якіх і складаюць банкаўскія работнікі, набывалі ў асноўным
дзяўчаты, хлопцаў было няшмат. І цяпер з усяго нашага працоўнага калектыву ў 39
чалавек толькі трое — мужчыны. Так склалася пасля таго, як служба інкасацыі
была рэарганізавана ў асобную самастойную службу, куды перайшлі працаваць
большасць мужчын, якія былі інкасатарамі раней. Да таго ж трэба адзначыць, што
не кожны мужчына здольны праяўляць пільнасць, уважлівасць і карпатлівасць, на
працягу поўнага працоўнага дня правяраючы і пераглядаючы слупкі даных у
бухгалтарскіх кнігах.
Прывядзём яшчэ некалькі лічбаў, якія яскрава сведчаць пра сённяшні стан спраў
Цэнтра банкаўскіх паслуг №211 філіяла №216 г. Полацка ААТ “ААБ “Беларусбанк””.
Нягледзячы на з’яўленне шэрага камерцыйных банкаўскіх арганізацый, людзі нашмат
ахвотней захоўваюць свае грошы ва ўкладах у ААТ “ААБ “Беларусбанк”, бо тут іх
захаванасць гарантуецца дзяржавай, што ўказана ў заканадаўстве. Ды і зняць
наяўныя грошы ў выпадку патрэбы не складае ніякіх праблем: у Лепелі працуюць
тры банкаматы і яшчэ два — у вёсках Бароўка і Заслонава, населеных пунктах з
колькасцю жыхароў больш за тры тысячы чалавек. Таксама да паслуг кліентаў —
шэсць інфакіёскаў.
Як адзначаюць банкаўскія работнікі, лепяльчане з кожным годам усё больш і больш
асвойваюць высокія тэхналогіі, карыстаюцца для правядзення плацяжоў інтэрнэт- і
мабільным банкінгам. Гэта вельмі зручна, абы толькі на рахунку былі грошы.
Дарэчы, па колькасці выпушчаных пластыкавых картак “Беларусбанк” на Лепельшчыне
таксама лідар — больш за 28 тысяч.
— Карты растэрміноўкі плацяжу, клубы “Бархат” для пенсіянераў, “Шчодры” для
тых, хто працуе, “Карт-бланш” для бізнесу — гэта, можна сказаць, ужо добра
ўсталяваная практыка, — расказвае Таццяна Курто. — У раёне паступова развіваецца
малы бізнес, доля якога ў валавым унутраным прадукце з году ў год становіцца
ўсё большай. Аднак і прадпрымальнікі часта сутыкаюцца з праблемамі, таму ім на
дапамогу па меры сіл прыходзім і мы. Напрыклад, ААТ “ААБ “Беларусбанк” выдзяляе
крэдыты пад льготныя працэнты, стаўка рэфінансавання — мінус адзін пункт для
малых прадпрыемстваў, якія займаюцца вытворчасцю прадукцыі або аказаннем
паслуг. Пагадзіцеся, гэта неблагі варыянт для прадпрымальніка, якому патрэбна
набыць, скажам, станок, машыну або іншы інструмент.
На што ўзяты курс работнікамі Цэнтра банкаўскіх паслуг №211 філіяла №216 г.
Полацка ААТ “ААБ “Беларусбанк”? Стаць яшчэ бліжэй да сваіх кліентаў — правесці
рамонт аперацыйнай залы такім чынам, каб абсталяваць як мага больш адкрытых
месцаў для працы з наведвальнікамі, каб кліент і работнік касы размаўлялі не
праз вузкае акенца, а седзячы за зручным сталом.