Зіма - не перашкода для гоншчыкаў
Лепельскія картынгісты разам са сваім трэнерам, па сумяшчальніцтве педагогам аб’яднання па інтарэсах «Картынг» раённага цэнтра дзяцей і моладзі Ігарам Клундуком не сядзелі на зімовых канікулах без справы. Прагнасць да хуткай язды не можа спыніць дрэннае зімовае надвор’е.
У сувязі з умовамі надвор’я няма магчымасці рухацца на свежым паветры па
лепельскай зямлі, таму картынгісты разам са сваім трэнерам шукаюць выйсце. На
гэты раз яны наведалі Мінск. Спартсмены паўдзельнічалі ў другім этапе кубка «Картлэнд» па пракатным картынгу.
Кожны з гоншчыкаў удзельнічаў у шасці заліковых заездах на картах. Прыемна
адзначыць, што лепяльчане прыехалі з дыпломамі, як і бачна на здымку.
Аднак гэта не галоўнае. Кожны з гоншчыкаў атрымаў вялікую порцыю адрэналіну і
станоўчых эмоцый, бо трасы ў гэтым клубе здзіўляюць сваёй неардынарнасцю.
Крутыя спускі і пад’ёмы, вялікая колькасць гледачоў, гул матораў — усё гэта
надае спаборніцтвам цікавасць і запамінальнасць. Будзе пра што расказаць
аднакласнікам!
— Траса вельмі спадабалася і дзецям, і мне. Яна двухузроўневая. Мае вельмі шмат
стромкіх паваротаў і мала месцаў для абгонаў, але тым не менш у юных пілотаў
атрымліваўся ўдалы абгон. Для іх гэта было вялікім вопытам — у гонцы і
трэніроўцы ехаць у натоўпе больш дасведчаных гоншчыкаў, якія выступалі ўжо не ў
першы раз.
Асаблівых слоў падзякі заслугоўваюць бацькі, бо на такое мерапрыемства патрэбны
сродкі, а таксама прадстаўнікі ТАА «ГлобаКарт» картынг-клуб FORSAGE за
магчымасць праходзіць вячэрнюю трэніроўку ў сваім клубе і пражыванне ў гасцініцы
«Дынама» ў Раўбічах. У класе «Міні» выступілі Ягор Жураўскі (дзявятае месца з
пятнаццаці) і Станіслаў Дзівін (восьмае месца з 15-ці), а ў класе «Юніёр»
паказалі сваё майстэрства Уладзіслаў Бакурын і Цімафей Хацько, — кажа Ігар
Клундук.
Наталля ХРАПАВІЦКАЯ.