Асвейскі цэнтр культуры адкрыюць у Верхнядзвінскім раёне
Цэнтр культуры адкрыюць 9 кастрычніка ў аграгарадку Асвея Верхнядзвінскага раёна, паведамілі карэспандэнту БЕЛТА ў Верхнядзвінскім райвыканкаме.
Пад дахам аднаго аб'екта аб'ядналіся гарадскі Дом культуры і бібліятэка, якія раней размяшчаліся ў розных прыстасаваных памяшканнях. Рэканструкцыя будынка плошчай 800 кв.м пачалася ў першым квартале бягучага года і праводзілася за кошт сродкаў абласнога і раённага бюджэтаў. Агульны аб'ём затрачаных сродкаў склаў каля Br200 тыс. У выніку маштабных работ поўнасцю абнавіліся ўнутраныя памяшканні. У іх размясціліся глядзельная і танцавальная залы, бібліятэка, калідоры, санвузел, сістэма ацяплення. У будучым на свабодных плошчах плануюць размясціць дзіцячую школу мастацтваў.
"Абноўлены аб'ект важны для сацыяльнага жыцця аграгарадка", - падкрэслілі ў райвыканкаме. Напрыклад, у зону абслугоўвання Цэнтра культуры ўваходзіць пяць населеных пунктаў агульнай колькасцю насельніцтва звыш 1,2 тыс. чалавек, у тым ліку 163 дзіцяці. Пры ГДК працуюць восем клубных фарміраванняў. Творчыя калектывы, якія наведваюць 96 чалавек рознага ўзросту - ад дзяцей да пенсіянераў, - актыўна ўдзельнічаюць у раённых і абласных мерапрыемствах: выставах, святах, фестывалях, кірмашах і інш. За студзень-верасень 2020 года з іх удзелам прайшло больш за 200 мерапрыемстваў.
Асвейская бібліятэка штогод абслугоўвае больш за 1 тыс. чытачоў. Яе фонд змяшчае 14,8 тыс. экзэмпляраў дакументаў, асноўную частку якіх складаюць кнігі. "З пераездам у новае памяшканне ў бібліятэкі з'явілася магчымасць больш поўна раскрыць свой патэнцыял пры правядзенні розных мерапрыемстваў, кніжных выстаў, павысіць камфортнасць для работнікаў і наведвальнікаў дзякуючы аўтаматызаваным працоўным месцам для карыстальнікаў і вылучэнню зон абслугоўвання дзяцей, падлеткаў і дарослых чытачоў", - адзначылі спецыялісты.
Урачыстае адкрыццё Цэнтра культуры адбудзецца з удзелам старшыні Віцебскага абласнога Савета дэпутатаў Уладзіміра Цярэнцьева, кіраўнікоў мясцовых органаў улады, работнікаў культуры і мясцовых жыхароў. Пасля знаёмства з аб'ектам усіх чакае святочны канцэрт "У асяроддзі сяброў".