На Пятроўскіх могілках адбыўся мітынг пад назвай «Героі і сёння з намі», бо адным з залогаў народнага адзінства ў нашай краіне з'яўляецца захаванне гістарычнай памяці і праўды аб падзеях мінулага.

Каля брацкай магілы, дзе пахаваны 18 чырвонаармейцаў, 17 з іх расстраляны германскімі акупантамі ў 1918 годзе, адзін закатаваны польскімі інтэрвентамі ў 1919-м, сабраліся лепяльчане, каб ушанаваць памяць герояў.

— Прайшло ўжо больш за 100 гадоў з пачатку Першай сусветнай вайны. Вырасла не адно пакаленне, якое ніколі не ведала і, спадзяемся, не даведаецца жахаў вайны. Але подзвігі, здзейсненыя ваярамі, назаўжды застануцца ў нашай памяці, - адзначылі прысутныя на мітынгу. - Сумеснымі намаганнямі мы павінны беражліва захоўваць і перадаваць нашчадкам памяць аб вялікіх здзяйсненнях пакалення пераможцаў, кожны з нас абавязаны працаваць, каб наша дзяржава з кожным годам рабілася шчаслівей.

У гэты знамянальны дзень ушаноўвалі і людзей працы - хлебаробаў, адзначыўшы раённае свята «Дажынкі». Лепельшчына павіншавала працаўнікоў сельскай гаспадаркі з заканчэннем уборачнай кампаніі і, вядома ж, адзначылі хлебаробаў, якія сваімі працоўнымі перамогамі ўслаўляюць наш родны край і Беларусь.

Камбайнеры, механізатары, вадзіцелі, аператары зернесушыльных комплексаў, кіраўнікі гаспадарак у будні і выхадныя, з раніцы і да захаду сонца працавалі, каб сабраць золата палёў. Усе яны ў гэты святочны дзень з рук прадстаўнікоў улады атрымалі граматы, падзякі і грашовыя прэміі.

Святы - гэта заўсёды яшчэ і падарункі. У Лепелі да Дня народнага адзінства - ва ўрачыстай абстаноўцы адбылося адкрыццё новага сквера пад назвай «17 верасня» па вуліцы Ульянка, у якога ёсць усе шанцы стаць любімым месцам адпачынку лепяльчан і гасцей нашага горада.

А вечарам адбыўся грандыёзны музычны фестываль Народнага адзінства.