Не так даўно ў мэсэнджэры “Вайбер” газеты “Лепельскі край” праходзіла галасаванне на вызначэнне пераможцы сярод лепшых дызайн-макетаў эмблемы. Трэба сказаць, лепяльчане прынялі ў ім самы актыўны ўдзел. Да нас і арганізатараўконкурсу прыходзілі паведамленні як ад удзельнікаў творчага спаборніцтва, так і тых, хто галасаваў, з рознымі ідэямі і просьбамі, якія адразу ж былі ўлічаны.
Стваральнікі дызайн-макетаў, якія набралі найбольшую колькасць галасоў, атрымалі заслужаныя ўзнагароды - дыпломы і прызы! Так, Дыпломам першай ступені ўзнагароджана Ганна Доўнар, супрацоўнік ДУ «Лепельскі раённы цэнтр гігіены і эпідэміялогіі». Дыпломам другой ступені адзначана калектыўная работа супрацоўнікаў ДЛГУ «Лепельскі лясгас» Наталлі Данілевіч, Наталлі Пярэдня і Дзмітрыя Іванова. Дыпломам трэцяй ступені ўзнагароджана Марыя Воюш.
-- Якія былі патрабаванні да конкурсных матэрыялаў? - задаем пытанне галоўнаму ўрачу ДУ "Лепельскі раённы цэнтр гігіены і эпідэміялогіі" Вікторыі Каротчык-Лаской.
-У першую чаргу дызайн-макет эмблемы павінен быць даступным для ўспрымання і разумення, адпавядаць тэматыцы і выклікаць цікавасць, не павінен быць перагружаны. Акрамя гэтага, павінен змяшчаць назву праекта, распрацаваны з выкарыстаннем кампутарнай графікі (CorelDRAW, AdobeIllustrator, AdobePhotoshop і інш), быць каляровым, прадстаўлены ў электронным выглядзе ў фармаце JPEG, PNG.
Абавязковая ўмова - аўтарства і арыгінальнасць, не павінен змяшчаць фатаграфіі, лагатыпы ці эмблемы іншых арганізацый.
Пры ацэнцы ўлічваліся таксама арыгінальнасць падыходу, мастацкая выразнасць і паўната раскрыцця тэмы.
Больш падрабязна аб праекце "Лепель — здаровы горад" папрасілі расказаць пераможцу конкурсу, памочніка ўрача-гігіеніста цэнтра гігіены і эпідэміялогіі Ганну Доўнар.
- "Здаровыя гарады" - гэта праект СААЗ, які развіваецца з 1988 года. Здаровы горад - гэта горад, які ўвесь час фармуе і паляпшае фізічнае і сацыяльнае асяроддзе, каб людзі маглі дапамагаць адзін аднаму ў паляпшэнні жыцця і максімальным раскрыцці сваіх магчымасцяў.
У 2019 годзе ў Беларусі зацверджаны дзяржаўны прафілактычны праект "Здаровыя гарады і пасёлкі", у які сталі ўключацца шматлікія населеныя пункты ва ўсіх рэгіёнах.
Праект прадугледжвае стварэнне ў населеных пунктах здароўезберагальнага асяроддзя, умоў для развіцця фізічнай культуры і спорту, захаванне і ўмацаванне здароўя навучэнскай моладзі, работнікаў прадпрыемстваў. У ліку прыярытэтаў таксама даступнае і здаровае харчаванне, даступная медыцына для ўсіх, развіццё валанцёрскага рухі, экалагічны дабрабыт.
— Як вядома, здароўе чалавека на 50 працэнтаў залежыць ад яго ладу жыцця. Фарміраванне здаровага ладу жыцця насельніцтва з'яўляецца важнейшым напрамкам дзяржаўнай палітыкі Рэспублікі Беларусь у галіне захавання і ўмацавання здароўя, - адзначыла Ганна Доўнар.
Па словах пераможцаў, эмблема сімвалізуе любоў да малой радзімы - гораду здаровых людзей, здаровых традыцый, здаровай экалогіі.
У завяршэннi хочацца сказаць, што эмблема пераможцы зараз будзе «візітнай карткай» Лепеля як здаровага горада. Прапануецца выкарыстоўваць яе ў якасці сімволікі, размяшчаць на інфармацыйна-адукацыйных матэрыялах, такіх як памяткі, улёткі, буклеты і іншыя, на розных інфармацыйна-адукацыйных матэрыялах у рамках прафілактычнага праекту «Лепель – здаровы горад» для прыцягнення ўвагі насельніцтва да здаровага ладу жыцця.
Віншуем пераможцаў і ўсіх удзельнікаў конкурсу за актыўны ўдзел і жадаем поспехаў у творчых пачынаннях!
https://www.lepel-kraj.by/novosti/puls-lepelshchiny/lepel-zdorovyj-gorod
Наталля Храпавіцкая.