У апошнія гады насельніцтва ў большасці сваёй імкнецца абаграваць прыватныя дамы газам і электрычнасцю. Печкі, як прылады для ацяплення памяшканняў, становяцца менш папулярнымі. Але гэта не значыць, што дровы перасталі быць запатрабаванымі ў насельніцтва.

Самы просты спосаб назапасіцца імі - звярнуцца ў паліўную арганізацыю.

Напярэдадні халадоў адпраўляемся ў Лепельскі філіял АУП «Віцебскаблпал», больш вядомаму ў нашым раёне як гарпал, каб даведацца, па якім кошце дровы, колькі можна замовіць на адно домаўладанне, а таксама атрымаць адказы на многія іншыя пытанні.

На тэрыторыі прадпрыемства нас гасцінна сустрэў дырэктар філіяла Вячаслаў Машара, які паказаў працэс працы і распавёў аб дзейнасці прадпрыемства.

Так, мы даведаліся, што пастаўшчыкамі драўніны, а гэта алешына і бяроза, з'яўляюцца Лепельскі лясгас і Лепельскі леспрамгас, торфабрыкет паступае з ААТ «Тарфабрыкетны завод ДЗІТВА» і ААТ «Тарфабрыкетны завод Лідскі».

-- Вячаслаў Паўлавіч, якія дакументы чалавек павінен даць, прыйшоўшы да вас, каб замовіць на зіму дровы?

-- Неабходны даведка аб месцы жыхарства, аб складзе сям'і (яны выдаюцца ў разліковым цэнтры г. Лепеля) і пашпарт, на падставе якіх выпісваецца паліўная кніжка. Калі кніжка ёсць, чалавеку проста трэба прыйсці да нас з пашпартам і зрабіць заяўку на патрэбны від паліва.

– Хто можа набыць дровы па льготнай цане і што ім трэба мець пры сабе?

– Права на льготу маюць удзельнікі і інваліды Вялікай Айчыннай вайны і прыроўненыя да іх, а таксама інваліды 1-й і 2-й груп, якія пражываюць асобна ад працаздольных членаў сям'і. Ім трэба, акрамя паліўнай кніжкі і пашпарта, мець пры сабе дакумент, які пацвярджае льготу.

– А ці магу я замовіць паліва на сваё імя суседу ці знаёмым?

– Заказ дастаўляецца сапраўды па адрасе рэгістрацыі ўладальніка паліўнай кніжкі. А ўжо потым ён можа аддаваць дровы каму заўгодна.

-- Некалькі слоў аб нормах водпуску паліва? Як адрозніваецца кошт звышнормы?

– Устаноўлены наступныя нормы водпуску цвёрдых відаў паліва, якія рэалізуюцца насельніцтву фіксаваным коштам, - 3,5 тоны торфабрыкету або 4,9 шчыльнага кубічнага метра драўніны. Пры рэалізацыі адначасова двух відаў паліва папярэдне вылічваюцца суадносіны ў адпаведнасці з нормай.

-- Пачым дровы і брыкет і ці залежыць кошт ад кіламетражу?

-- Калі мы гаворым аб горадзе, то за норму паліўных брыкетаў па фіксаваным кошце прыйдзецца заплаціць 120 рублёў. За норму сечаных дроў па паліўнай кніжцы - 250 рублёў, за чуркі -- 170. Калі дастаўка ажыццяўляецца за межы горада, дадаткова бярэцца плата за кіламетраж. Паліва ў свабодным продажы – прыкладна на 70 працэнтаў даражэй.

-- Калі ў вас пачынаецца гарачая пара?

-- Прыкладна з мая. Але людзі робяць гэта не таму, што ў нас вялікія чэргі. І дровы, і брыкет дастаўляем заказчыку хутка - на працягу пары дзён. Многія прытрымліваюцца прынцыпу: рыхтуй сані летам, а воз зімой. Бо свежыя дровы, нарыхтаваныя восенню, да зімы могуць не паспець папрасыхаць. Але і зараз паступаюць замовы: адны «падстрахоўваюцца» на выпадак марознай доўгай зімы, іншыя не паспелі нарыхтаваць за летні перыяд. Такім чынам, праца на прадпрыемстве кіпіць круглы год.

У гутарцы таксама даведаліся, што большай папулярнасцю карыстаюцца ў апошнія гады колатыя дровы і часцей за ўсё заказваюць іх людзі мудрага ўзросту.

Пакідаючы тэрыторыю прадпрыемства, з упэўненасцю магу сказаць, што кіраўніцтва сочыць за своечасовасцю дастаўкі, якасцю прадукцыі і прытрымліваецца дэвізу: «Цяпло і ўсмешка ў кожны дом»!

***

Ужо на выездзе сустрэлі жыхара Лепеля, які збіраўся зрабіць замову:

-- Зваць мяне Сяргей Міхальчык. Прыехаў маці купіць дровы для цвёрдапаліўнага катла. Але каб іх сыходзіла менш, выкарыстоўваем і торфабрыкет.

Дровы хутка перагараюць, наганяюць тэмпературу, але яна доўга не трымаецца. А вось торфабрыкет захоўваюць цяпло працяглы час…

Наталля Храпавіцкая. Газета «Лепельскі край»