07.07.2025

Дзень Незалежнасці Рэспублікі Беларусь на Лепельшчыне

На Лепельшчыне мерапрыемствы да Дня Незалежнасці Рэспублікі Беларусь пачаліся з ускладання кветак да воінскіх пахаванняў.

На галоўнай сцэне прайшла канцэртная праграма "Пад мірным небам Беларусі". Землякоў павіншавалі старшыня Лепельскага раённага выканаўчага камітэта Міхаіл Кісялевіч і дэпутат Палаты прадстаўнікоў Нацыянальнага сходу Рэспублікі Беларусь Віктар Азаронак.

На плошчы горада разгарнулася выстава-конкурс "Тэрыторыя памяці". Гэта ўнікальная выстава тэматычных інсталяцый, прысвечаных памяці аб Вялікай Айчыннай вайне. Кожная пляцоўка - гэта глыбокая мастацкая работа, якая перадае дух часу і павагу да мінулага. У гарадскім парку прайшла цырымонія ўзнагароджання дыпламантаў і пераможцаў раённага конкурсу тэматычных пляцовак "Тэрыторыя памяці" 1 месца: аўтатранспартнае прадпрыемства 14. 2 месца: Філіял "Лепельводаканал" і гімназія г. Лепеля. 3 месца: Лепельскі лясгас і цэнтральная раённая бальніца.

На плошчы працавалі пляцоўкі, арганізаваныя арганізацыямі і прадпрыемствамі горада: выставы, гульні, святочны гандаль, выстава ваеннай тэхнікі і, вядома ж, паходная каша.

А ў гарадскім парку прайшоў конкурс ДранікFEST - адна з навінак у праграме святкавання Дня Незалежнасці Рэспублікі Беларусь. Моладзь раёна падзялілася на 2 каманды - "Цмокі" і "Сябры", каб прыгатаваць лепшыя дранікі на Лепельшчыне. Конкурс па "Пасадцы бульбы", чыстка гародніны і яе драбненне, замес цеста, гатаванне на калодзе, арыгінальная падача стравы - не так проста аказалася прыгатаваць нашы дранікі. Моладзь справілася, было крута, смачна, весела!

Нікога не пакінула абыякавым выступленне вакальна-інструментальнага гурта "Гвардыя". Канцэрт прайшоў на цэнтральнай плошчы горада і сабраў мноства гледачоў, якія прыйшлі атрымаць асалоду ад жывой музыкі і святочнай атмасферы. Гурт "Гвардыя", вядомы сваімі патрыятычнымі песнямі і запальнымі мелодыямі, прадставіў гледачам праграму, напоўненую як класічнымі хітамі, так і новымі кампазіцыямі. Музыкі выканалі любімыя многімі песні, якія адлюстроўваюць дух незалежнасці і гонар за родную краіну.

Прайшлі і спаборніцтвы па армрэстлінгу і гіравым спорце - першынство горада Лепеля ў армрэстлінгу: 1 месца Ігар Крукаў, 2 месца Уладзіслаў Тарашкевіч, 3 месца Цімафей Хацкевіч, у гіравым спорце - лідар Іван Маскалькоў.

Самых энергічных удзельнікаў свята сабраў фестываль фарбаў Holy.MIX з удзелам вядучага Ігара Вiлстарава. Фарбы, запальная музыка і нястрымная весялосць!

У вячэрняй праграме - канцэртная праграма Ганны Шаркоўскай "Струны душы", канцэрт кавер-гурта "NeMore" (г. Мінск), дыскатэка з удзелам DJ Erni і MC Adahovski (г. Мінск).

Лепель далучыўся да акцыі "Праспяваем гімн разам!", якая завяршылася святочным феерверкам.

Фінальным акордам свята стала дыскатэка з удзелам Арцёма Феніксава і ды-джэя Яўгена Зінкевіча (г. Мінск)