11.10.2023

Галоўная мэта камісіі па справах непаўналетніх - аказанне дапамогі і падтрымкі

Нетыповы для камісіі пратакол разгледзелі на чарговым пасяджэнні.

Пра тое, што ў Лепельскім раёне праводзіцца комплексная прафілактычная работа па рэалізацыі Дэкрэта № 18, сведчыць пастаяннае правядзенне пасяджэнняў камісій па справах непаўналетніх райвыканкама.

Нетыповы для камісіі пратакол разгледзелі на чарговым пасяджэнні. Фігурантамі гучнай справы сталі непаўналетнія жыхаркі Лепеля.

З пратакола: «Дзве непаўналетнія дзяўчынкі, гуляючы па гарадскім парку, здзейснілі крадзеж сумкі-барсеткі, якая вісела на дзіцячай пляцоўцы. Асабістую рэч на 15 хвілін без нагляду пакінуў 15-гадовы юнак».

Юныя злачынцы ўзялі чужую рэч, адышлі далей ад парка і зазірнулі ў сумку. У ёй дзяўчынкі знайшлі мабільны тэлефон у чахле і 7 рублёў. Грошы лепельчанкі падзялілі паміж сабой, чахол знялі для ўласных патрэб, а барсетку і мабільны тэлефон выкінулі ў раку Ула.

Праз некаторы час на інтэрнэт-пляцоўцы «Куфар» маці ўладальніка тэлефона натыкнулася на аб'яву аб продажы знаёмага чахла для мабільнага тэлефона.

Камісія ўважліва разабрала ўсе дэталі злачынства, правяла індывідуальную гутарку з законнымі прадстаўнікамі дзяўчынак. Бацькоў заклікалі ўзгадніць свае дзеянні і намаганні ў выхаванні сваіх дзяцей. Часцей хваліць, ісці насустрач запатрабаванням і інтарэсам дзіцяці, не спрачацца з дзецьмі па кожнай дробязі - такія парады далі спецыялісты.

Адзначым, усяго на пасяджэнні было разгледжана каля дзесяці пратаколаў. Важна разумець, што галоўнай мэтай членаў камісіі з'яўляецца аказанне дапамогі і падтрымкі.

- Наша камісія дазваляе своечасова выяўляць прычыны і ўмовы правін дзяцей і праводзіць з імі прафілактычную работу, а таксама ў адносінах да іх бацькоў, якія не выконваюць належным чынам бацькоўскія абавязкі, - адзначыла Таццяна Часнакова, намеснік старшыні камісіі па справах непаўналетніх.

Па матэрыялах газеты «Лепельскі край»