Галоўную тэму Адзінага дня інфармавання абмеркавалі ў Лепельскім раённым краязнаўчым музеі. Тут сабраліся прадстаўнікі адразу некалькіх калектываў: Лепельскага філіяла абласнога спажывецкага таварыства, пансіяната "Ладэ", дзiцячага рэабілітацыйна-аздараўленчага цэнтра "Жамчужына", а таксама Лепельскага ваеннага санаторыя.

Галоўным спікерам сустрэчы стаў Генадзь Балбатоўскі, Дырэктар Рэспубліканскага цэнтра па аздараўленні і санаторна-курортным лячэнні насельніцтва.

Удзельнікамі гутаркі таксама сталі кіраўнік раёна Міхаіл Кісялевіч, намеснік старшыні райвыканкама Вераніка Хомбак, начальнік аддзела ідэалагічнай работы і па справах моладзі райвыканкама Святлана Шавялёва і Галіна Бачук, намеснік начальніка прадстаўніцтва Віцебскага абласнога ўпраўлення Рэспубліканскага цэнтра па аздараўленні і санаторна-курортным лячэнні.

Апошнія гады адпачынак у санаторыях Беларусі стаў не толькі важным складнікам у жыцці кожнага, хто клапоціцца пра сваё здароўе, але і паступова ўвайшоў у моду. Пабываць у беларускай здраўніцы - правіла добрага тону не толькі для грамадзян нашай краіны, але і для замежнікаў. І сапраўды, як толькі набліжаецца чарговы санаторна-курортны сезон, ажыятаж у набыцці пуцёвак імкліва ўзрастае.

- Людзі сталі больш клапаціцца пра сваё здароўе, пачало мяняцца спажывецкае стаўленне да яго. Сёння быць здаровым стала не толькі неабходна, але і модна. Санаторыі асацыююцца з прафілактычнай скіраванасцю, бо цяпер гэта шматфункцыянальныя комплексы, якія аказваюць не толькі медыцынскія паслугі. Адсюль і павышэнне попыту. Грамадзяне набываюць пуцёўкі за свае грошы, гэта значыць укладваюць у здароўе. Дзяржава ўсё для гэтага робіць! - адзначыў Генадзь Балбатоўскі.

Тэму санаторна-курортнага лячэння працягнуў кіраўнік раёна Міхаіл Кісялевіч. Старшыня райвыканкама адзначыў, што Лепельшчына ў гэтым кірунку атрымала поспех, бо на тэрыторыі раёна паспяхова функцыянуюць такія аб'екты, як Бярэзінскі біясферны запаведнік, Лепельскі ваенны санаторый, цэнтр "Жамчужына", пансіянат "Ладэ". Нашы аздараўленчыя аб'екты - свайго роду візітная картка раёна.

Праграмай сацыяльна-эканамічнага развіцця Рэспублікі Беларусь на 2026-2030 гады вызначана сем прыярытэтаў пяцігодкі. Першы прыярытэт -нацыянальная дэмаграфічная бяспека, гэта значыць захаванне насельніцтва, умацаванне здароўя нацыі і падтрымка сям'і. Сёмы - рэалізацыя турыстычнага патэнцыялу. Гэтыя прыярытэты ў тым ліку будуць рэалізаваны праз паспяховую работу здраўніц.