07.08.2025

Мантажнік, муляр, бетоншчык, цясляр... Усё, што мы бачым на нашых вуліцах, з'явілася дзякуючы карпатлівай працы будаўнікоў

У нашым раёне самай буйной арганізацыяй з'яўляецца ДКУСП "Лепельская ПМК-75". Напярэдадні прафесійнага свята мы сустрэліся з дзяўчынай, якая робіць памяшканні і будынкі прыгожымі, – тынкоўшчыкам Дар'яй Чумак.

Напэўна, многім прадстаўляць Дашу і не трэба, бо яе мы бачым на раённай сцэне на розных мерапрыемствах.

Дар'я Чумак – творчая асоба, пакуль вучылася ў аграрна-тэхнічным каледжы, актыўна ўдзельнічала ў тэатральным і музычным жыцці ўстановы адукацыі. Яна выконвала ролі ў тэатральных пастаноўках і займалася вакалам, у тым ліку выступаючы з патрыятычнымі песнямі, прысвечанымі Беларусі. Таксама Дар'я падчас вучобы была ўдзельніцай культурнага праекта "Ударнае жыццё", які дае магчымасць навучэнцам праявіць сябе і развіваць свой творчы патэнцыял.

Акрамя гэтага, наша суразмоўніца была задзейнічана ў інклюзіўным тэатральным калектыве "Два крылы", які аб'ядноўвае студэнтаў і людзей з інваліднасцю па зроку. Дзяўчына шмат разоў удзельнічала ў мерапрыемствах аграрна-тэхнічнага каледжа і іншых культурных падзеях раёна.

Была шматразовай пераможцай як раённых, так і абласных конкурсаў, прадстаўляла каледж на многіх фестывалях.

Зараз Даша ўдзельнічае ў тэлевізійным праекце "Зорны шлях". Яна гучна заявіла пра сябе на адборачным туры на Віцебшчыне. Не толькі вакальныя дадзеныя, але і ўменне трымацца на сцэне, сцэнічны вобраз з першых акордаў ператварылі строгае журы ў прыхільнікаў пачынаючай зорачкі.

Калі хто не ведае, "Зорны шлях" – папулярнае вакальнае шоу на АНТ! Бо з удзельнікамі праекта працуюць вопытныя прадзюсары. З кожным яны дзеляцца сваімі ведамі і разглядаюць яго як патэнцыйнага артыста на беларускай сцэне. Даша трапіла ў каманду Яўгена Алейніка і цяпер працуе анлайн з прафесійнымі педагогамі.

Яўген Алейнік – заслужаны дзеяч мастацтваў Беларусі, кампазітар, прадзюсар гурта "Аўра". Яўген Алейнік – асоба ў нашай краіне вядомая. Менавіта ён стаў аўтарам такіх хітоў, як "Боль зямлі", "Літасці малю да Беларусі", "Памятаеце", "Каханую не аддаюць". У творчай скарбонцы Яўгенія – падзяка ад Прэзідэнта Рэспублікі Беларусі.

Па словах Дар'і, удзел у праекце – унікальная магчымасць, якую ёй далі арганізатары (Федэрацыя прафсаюзаў Беларусі, тэлеканал АНТ і музычная медыякампанія).

Дар'я – лепельчанка. Яшчэ калі вучылася ў сярэдняй школе №3, выступала на сцэне. Пасля дзевяці класаў паступіла ў каледж. У сакавіку гэтага года дзяўчына скончыла Лепельскі дзяржаўны аграрна-тэхнічны каледж з чырвоным дыпломам па спецыяльнасці "тэхнік-будаўнік" і прыступіла да прафесійнай дзейнасці.

Калі меркаваць па фізічных нагрузак і ўмовах працы, то прафесія тынкоўшчыка павінна быць мужчынскай. Але практыка паказвае, што лепш атрымліваецца ў жанчын. У цяперашні час Дар'я разам са сваімі маладымі калегамі і настаўнікамі працуе ў вёсцы Домжарыцы на ўнутраным аздабленні шматкватэрнага дома. ...Таму сустрэцца мы змаглі толькі ў вячэрні час.

– Стамілася?

– Ёсць трохі, але ўжо прывыкаю, паступова ўцягваюся ў прафесію. Ужо разумею, як правільна трымаць інструменты, як размяркоўваць нагрузку, як працаваць эфектыўна.

Многае даводзіцца спасцігаць на практыцы. Ужо спазнала некалькі прафесійных сакрэтаў, якім у навучальных класах не навучаць — як дамагчыся ідэальна роўнай паверхні, як працаваць з капрызнымі дэкаратыўнымі тынкоўкамі, як выпраўляць памылкі з мінімальнымі стратамі часу і матэрыялаў. Упэўнена, у мяне ўсё атрымаецца, таму што прафесія падабаецца. Не шкадую, што выбрала менавіта гэтую сферу. Хоць яна і не з лёгкіх, пад вечар без рук, без ног дадому прыходзіш. Але калі бачыш вынік сваёй працы, прыемна глядзець, як стала чысценька і прыгожа. Разумееш, што ўсё гэта не дарма.

– Як прынялі ў калектыве?

– Добра. Старэйшыя калегі дапамагаюць, раяць, за што ім вялікі дзякуй.

Прыемна, што адзін з кірункаў работы прафсаюзаў па падтрымцы маладых людзей – гэта дапамога ў адаптацыі на першым працоўным месцы. Практыка інстытута настаўніцтва дзейнічае практычна ва ўсіх арганізацыях розных галін эканомікі. Асаблівую ролю настаўніцтва адыгрывае на прамысловых прадпрыемствах, так як кожная вытворчасць мае сваю спецыфіку. І ў многіх выпадках агульнай падрыхтоўкі ва ўстанове адукацыі недастаткова. Таму з першага працоўнага дня за маладымі людзьмі замацоўваюцца вопытныя настаўнікі, якія дапамагаюць хутка ўліцца моладзі ў працоўны працэс.

– Што параіш тым, хто хоча выбраць гэтую прафесію, але трохі сумняваецца?

– Калі хтосьці сумняваецца, ці варта асвойваць такую прафесію – адназначна варта! Гэта запатрабаваная на рынку прафесія і магчымасць бачыць вынікі сваёй працы.

Акрамя таго, што малады спецыяліст стамляецца на працы, вечарам займаецца вакалам, ды яшчэ паспявае часам у спарткомплексе і ў валейбол пагуляць. У каманду запрасіла выкладчыца фізкультуры з каледжа.

Калі казаць пра перспектыву, то сёння самы перспектыўны спецыяліст – той, які ўмее працаваць не толькі галавой, але і рукамі. На жыццё сабе ён дакладна заробiць. Дар'я – адна з такіх людзей.