Дзень ратавальніка. Два словы, за якімі тысячы выратаваных жыццяў.

У Лепельскім раённым аддзеле па надзвычайных сітуацыях панавала асаблівая атмасфера - строгая і адначасова ўрачыстая. У зале сабраліся тыя, для каго рызыка стала неад'емнай часткай прафесіі, а выратаванне чужых жыццяў — штодзённай працай. Тут прайшло ўрачыстае мерапрыемства, прысвечанае прафесійнаму святу - Дню ратавальніка.

З прывітальным словам да віноўнiкаў урачыстасці звярнуўся начальнік Лепельскага РАНС Іван Маскалькоў. Кіраўнік аддзела падкрэсліў, што спакой і бяспека лепельчан — гэта вынік кругласутачнай гатоўнасці байцоў МНС прыйсці на дапамогу ў любую хвіліну. Падзякаваўшы калегам за самаадданую працу, ён перайшоў да прыемнай місіі — уручэння заслужаных узнагарод па выніках працы за 2025 год.

За ўзорнае выкананне службовага абавязку і высокія вынікі лепельчанам былі прысвоены спецыяльныя званні і ўручаны ўзнагароды рознага ўзроўню. Таксама былі ўзнагароджаны кіраўнікі раёна, якія на працягу многіх гадоў аказваюць цеснае супрацоўніцтва і ўзаемадапамогу аддзелу.

Святочнае мерапрыемства завяршылася душэўнымі пажаданнямі, якімі абменьваліся калегі. Галоўнае з іх гучала лейтматывам усёй сустрэчы і адклікалася ў кожным сэрцы: хай трывожныя сірэны ў нашым раёне гучаць толькі ў навучальных мэтах, а кожны баявы выезд абавязкова заканчваецца шчасным вяртаннем дадому да сваіх сем'яў.