06.11.2025

Сёння педагогі і навучэнцы дзяржаўнай установы адукацыі "Слабадская сярэдняя школа імя М.М. Пшонка Лепельскага раёна" наведалі Дом Урада

Удзельнікі сустрэчы з задавальненнем акунуліся ў атмасферу дэпутацкіх будняў: пазнаёміліся з дзеючай экспазіцыяй, прысвечанай дзейнасці Палаты прадстаўнікоў і Авальнай залы, даведаліся пра асаблівасці работы дэпутатаў і законапраекты, якія зараз знаходзяцца на іх разглядзе і многае іншае. Таксама землякі пагутарылі з дэпутатам па Лепельскай выбарчай акрузе Віктарам Азаронкам.

Гасцей Дома Урада асабліва ўразіла шматвектарнасць дзейнасці Палаты прадстаўнікоў у цэлым і дэпутатаў у прыватнасці, а таксама насычанасць іх працоўных будняў. Педагогі і дзеці таксама наведалі Прэзідэнцкую бібліятэку.

Валерый Уладзіміравіч Тухто, настаўнік гісторыі ДУА "Слабадская сярэдняя школа імя Н. М. Пшонка Лепельскага раёна", захоплены і таленавіты краязнаўца, падарыў Прэзідэнцкай бібліятэцы сваю новую кнігу "Замошша. Гісторыя вескі і ваколіц".

У бібліятэчным фондзе ўжо ёсць кнігі Валерыя Уладзіміравіча, якія займаюць годнае месца ў яе экспазіцыі.

- Валерый Тухто - чалавек, адданы беларускай зямлі і роднаму краю, таленавіты даследчык, які не проста актыўна займаецца пошукавай работай, але і залучае ў яе сваіх вучняў. З вынікамі праведзенай ім даследчай і пошукавай работы можна пазнаёміцца не толькі на старонках выдадзеных ім кніг, але і наведаўшы школьны музей, які цалкам справядліва можна назваць сапраўднай жывой энцыклапедыяй Лепельшчыны часоў Вялікай Айчыннай вайны, - адзначыў Віктар Азаронак.