05.12.2024

Снежань абвешчаны ў Беларусі месяцам гастранамічнага турызму. Дзе, як не на Лепельшчыне, пагаварыць на гэтую тэму?

Страва родам з Беларусі, круглая па форме, робіцца з бульбы, але не дранік. Цепеліны - у Літве, хінкалі – у Грузіі, і толькі ў адным рэгіёне Беларусі – клёцкі з душамі. Гэта нацыянальная ежа са статусам "гісторыка-культурная каштоўнасць". Радзіма ўнікальнай стравы - Лепельшчына.

Пра мясцовых жыхароў кажуць: калі нарадзіўся першы лепельчанін, тады і з'явіліся клёцкі. Іх умеюць гатаваць усе без выключэння гаспадыні поўначы Беларусі.

Удзельніцы народнага клуба нацыянальнай кухні "Стайскія прысмакі" – гонар рэгіёна. Іх па праве называюць захавальніцамі традыцый і пераемніцамі мясцовых кулінараў-старажыл. Дзякуючы ім Лепельскія клёцкі з душамі атрымалі статус "гісторыка-культурнай каштоўнасці" краіны.

У кожнай гаспадыні свой падыход, але ёсць рэцэпт, які прайшоў праверку стагоддзямі. Менавіта ён лічыцца эталонным і менавіта гэты смак трэба абавязкова пакаштаваць.