Штогод у першыя нядзелі снежня ў Беларусі адзначаецца Дзень юрыста. Якое стаўленне загс мае да гэтага свята? Усё проста: працаўнікі загса павінны мець вышэйшую юрыдычную адукацыю, паколькі ўся праца будуецца на веданні і прымяненні заканадаўства аб шлюбе і сям'і.

Напярэдадні свята мы пастараемся адказаць на самыя папулярныя пытанні, па якіх грамадзяне да нас звяртаюцца.

 

Праз колькі дзён нам можна распісацца?

Не раней чым праз тры дні і не пазней як праз тры месяцы з дня падачы заявы. Аднак па ўважлівай прычыне (напрыклад, цяжарнасць нявесты) тэрмін можа быць скарочаны.

 

А што па датах?

Мы - загс невялікі, таму, як правіла, месца хапае ўсім. Распісацца вы можаце ў любы дзень тыдня і нават (калі гэта ўрачыстая рэгістрацыя) у нядзелю. Аднак калі вы жадаеце нейкi канкрэтны час (найбольш папулярны ў маладых час з 14-00 да 16-00), рэкамендуемы запісвацца загадзя.

Папярэдне можна запісацца па тэлефоне 3-48-09 ці прыйсці асабіста.

 

А колькі гэта каштуе?

За рэгістрацыю заключэння шлюбу трэба заплаціць дзяржпошліну ў памеры адной базавай велічыні (цяпер гэта 32 рублі). А калі плануеце ўрачыстую рэгістрацыю, то яшчэ даплаціць 22 рублі 45 капеек.

Тлумачым: неўрачыстая рэгістрацыя ажыццяўляецца ў кабінеце, дзе вядзецца прыём грамадзян. Усё займае літаральна некалькі хвілін. Вы прыйшлі ўдваіх, у вас спыталі згоду, вы паставілі подпісы, вам уручылі пасведчанне аб шлюбе.

Урачыстая рэгістрацыя прадугледжвае правядзенне цырымоніі шлюбу ў зале ўрачыстасцей з адпаведным сцэнарыем і музычным суправаджэннем.

 

Мы - грамадзяне Расіі, ці можна ў вас распісацца?

Аддзел загса рэгіструе шлюбы паміж замежнымі грамадзянамі, замежнымі грамадзянамі і асобамі без грамадзянства, асобамі без грамадзянства толькі ў выпадку, калі хаця б у аднаго з іх ёсць дазвол на пастаяннае пражыванне ў Рэспубліцы Беларусь.

За рэгістрацыяй заключэння шлюбу ў Рэспубліцы Беларусь замежным грамадзянам можна звярнуцца ў дыпламатычнае прадстаўніцтва/консульскую ўстанову замежнай дзяржавы.

 

Як нам развесціся ў загсе і што для гэтага трэба?

Аддзел загса скасоўвае шлюб толькі ў выпадку, калі ў вас няма агульных непаўналетніх дзяцей, спрэчкі аб маёмасці і вы абодва згодны на скасаванне шлюбу. Калі гэтыя ўмовы не выконваюцца, па скасаванне шлюбу трэба звярнуцца ў суд.

Для скасавання шлюбу ў загсе неабходна прыйсці ўдваіх з дакументамі, якія сведчаць асобу, пасведчаннем аб заключэнні шлюбу, напісаць заяву і аплаціць дзяржпошліну ў памеры 4 базавыя велічыні (цяпер гэта 128 рублёў). Рэгістрацыя скасавання шлюбу праводзіцца па заканчэнні аднаго месяца з дня падачы заявы ў прысутнасці мужа і жонкі.

Алена Бельская, начальнік аддзела ЗАГС Лепельскага райвыканкама