28.10.2022

Цэны на кантролі ў дэпутата

Як вядома, Прэзідэнт Беларусі Аляксандр Лукашэнка па выніках нарады аб цэнавай сітуацыі ў краіне 6 кастрычніка падпісаў Дырэктыву №10 «Аб недапушчальнасці росту цэн». 19 кастрычніка Савет Міністраў Рэспублікі Беларусь прыняў пастанову №713 «Аб сістэме рэгулявання цэн», паводле якой вызначаны 370 таварных пазіцый, на якія ўстаноўлены максімальныя надбаўкі імпарцёраў і гранічныя гандлёвыя надбаўкі. Рэгуляванне надбавак закранула 138 харчовых тавараў і 222 нехарчовых. Велічыня надбавак, зацверджаная пастановай, вар'іруецца ад 15 да 55 працэнтаў.

У Лепелі, як, зрэшты, і іншых раёнах і рэгіёнах рэспублікі, працягваюцца маніторынгі цэн на тавары, асабліва - на сацыяльна значныя. На гэты раз мы адпраўляемся ў гандлёвыя кропкі горада разам з дэпутатам Палаты прадстаўнікоў Нацыянальнага сходу Рэспублікі Беларусь Ігарам Мартынавым. У полi зроку парламентарыя - не толькі буйныя, але і кампактныя крамы розных форм уласнасці.

Хлебабулачныя вырабы, малочныя, крупы, гародніна і садавіна, мяса... У гандлёвых кропках Ігар Феліксавіч звяртаў увагу не толькі на цэны, але і асартымент, тэрміны прыдатнасці прадукцыі, наяўнасць тавару, у тым ліку айчыннага.

Так, напрыклад, «Санта супер» - прасторная крама, якая з'явілася ў нашым раёне пару гадоў таму назад і за гэты перыяд стала папулярнай сярод лепельчан. Дэпутат ацаніў гандлёвую кропку станоўча, з пераваг адзначыў вялікі выбар тавараў, а таксама тое, што цэны на пачатак і канец кастрычніка не змяніліся, па якасці тавара ў яго таксама пытанняў не ўзнікла.

У гэты дзень не засталіся па-за ўвагай гандлёвыя кропкі «Хіт! Экспрэс», крамы Лепельскага філіяла Віцебскага аблспажыўтаварыства і іншыя.

У кулінарыі №1 «Ежа і кава» загадчыца Леаніда Макарэвіч расказала дэпутату аб асартыменце прадукцыі, прадстаўленай на прылаўках. Трэба сказаць, асабіста ў мяне вочы разбягаюцца, калі жадаю абраць у гэтай гандлёвай кропцы пірожнае. Ведаю дакладна, што тут яны заўсёды свежыя і па прымальнай цане.

Лепельчане заходзяць у кулінарыю, каб набыць гатовыя салаты, катлеты, рыбу і іншыя стравы

– Звяртаю ўвага не толькі на супермаркеты, бо не ва ўсіх грамадзян ёсць магчымасць дабрацца да іх. Хаця ў такіх невялікіх гарадах, як Лепель, хочацца адзначыць зручнае размяшчэнне важных сацыяльных аб'ектаў - усё знаходзіцца ў крокавай даступнасці.

Маніторынг цэн праводзім на сістэмнай аснове. Асаблівую ўвагу ўдзяляем сацыяльна значным таварам і лекам. Вывучаючы асартымент, звяртаю асаблівую ўвагу на тое, як у гандлёвай кропцы прадстаўлены беларускі і мясцовы вытворца.

Радуе, што у крамах у дастатковай колькасці на паліцах пладова-агароднінная прадукцыя – якая зараз найбольш запатрабавана. Беларускі яблык, напрыклад, таннейшы чым імпартны.

Важна, каб грамадзяне, наведваючы гандлёвыя кропкі кожны дзень, маглі купіць тавар па адной і той жа цане. Перад прадпрыемствамі, гандлем, пастаўшчыкамі і імпарцёрамі пастаўлена задача шукаць магчымасці для зніжэння выдаткаў, каб павялічваць рэнтабельнасць не за кошт росту цэн.

Дэпутат адзначыў, што часта праводзіць утоены маніторынг. Складаючы ў кошык сацыяльна значныя тавары, асабіста правярае адпаведнасць лічбаў на цэнніках і ў чэках.

Наведаў парламентарый у Лепелі і аптэкі. Па выніках маніторынгу асартымент і кошты у іх адпавядаюць патрабаванням.

Калі які-небудзь прэпарат адсутнічае, прапануюць аналагі. Часам людзі паведамляюць аб розніцы ў цэнах на лекі ў розных аптэках. Такія нюансы тлумачацца рознымі пастаўкамі.

На думку дэпутата, у цэлым цэнавая палітыка на сацыяльна значную групу тавараў вядзецца ў адпаведнасці з пастановай Саўміна «Аб сістэме рэгулявання цэн», асноўная мэта якога - падтрыманне цэнавай стабільнасці, процідзеянне спекулятыўнаму росту цэн і магчымаму дэфіцыту асобнай катэгорыі тавараў.

Таксама Ігар Феліксавіч не ўпусціў магчымасці пагутарыць з пакупнікамі.

Так, наведвальнік крамы «Санта супер» сказаў, што гандлёвы аб'ект зручна размешчаны - на адной з цэнтральных вуліц горада, а каля крамы маецца прасторная стаянка. Таму пасля працы заязджае сюды за прадуктамі. Увесь кастрычнік звяртаў увагу на цэны, нават некаторыя фатаграфаваў на тэлефон, але парушэнняў не знайшоў.

Наталля Храпавіцкая.

https://lepel-kraj.by/novosti/vlast-i-lyudi/ceny-na-kontrole-u-deputata-28-10-2022