27.05.2022

У Лепелі прайшло пашыранае выязное пасяджэнне Прэзідыума Савета Рэспублікі па працы са зваротамі грамадзян

Тэма важнага мерапрыемства не толькі для раёна, але і Віцебскай вобласці - падвядзенне вынікаў па працы са зваротамі грамадзян пасля асабістых прыёмаў, якія прайшлі 26 мая ва ўсіх раёнах членамі Савета Рэспублікі.

Старшыня Савета Рэспублікі Наталля Качанава адзначыла, што такі фармат - гэта адна з найбольш аператыўных форм сувязі насельніцтва і прадстаўнікоў органаў улады.

У Віцебску, дзе прыём праводзіла Наталля Іванаўна, каля траціны зваротаў датычыліся сферы ЖКГ і добраўпарадкавання, і ўсё можна было вырашыць на месцы, не даводзячы да звароту да сенатара.

- Гэта не імгненныя праблемы, людзі гадамі ходзяць па інстанцыях, а праблемы не вырашаюцца. Такога быць не павінна. Час выбраў вас, давайце працаваць так, каб было камфортна людзям. Кіравацца трэба не асабістымі амбіцыямі, а інтарэсамі людзей. Прэзідэнт нашай краіны ставіць нам гэту задачу, і мы павінны адпавядаць ёй, - адзначыла старшыня Савета Рэспублікі.

Падчас пасяджэння ўвага прысутных акцэнтавана на тым, што пытанне працы са зваротамі грамадзян ніколі не губляла сваёй актуальнасці, а цяпер нават набывае яшчэ большую актуальнасць, таму што цяпер на кожнага чалавека ідзе інфармацыйная плынь не заўсёды праўдзівай, а часта ілжывай інфармацыі.