10.11.2025

Ураджэнец Лепельшчыны Яўген Міхно прынёс камандзе Беларусі бронзу чэмпіянату свету па самба ў Бішкеку

Беларуская зборная ўпэўнена выступіла на чэмпіянаце свету па самба ў сталіцы Кыргызстана. У першы ж спаборніцкі дзень нашы спартсмены заваявалі пяць узнагарод рознай вартасці, адна з якіх па праве належыць ураджэнцу Лепельшчыны, майстру баявога самба Яўгену Міхно.

У вагавой катэгорыі да 74 кілаграмаў Яўген прадэманстраваў характар, волю да перамогі і бездакорную тэхніку. Прайшоўшы самых складаных супернікаў, ён здолеў прабіцца ў паўфінал, дзе ва ўпартай барацьбе саступіў свайму візаві. Перамога ў паядынку за трэцяе месца дазволіла спартсмену падняцца на п'едэстал гонару і прынесці ў скарбонку нацыянальнай каманды бронзавы медаль.