13.08.2025

У разгар уборачнай кампаніі многія гаспадаркі Беларусі атрымліваюць нечаканую, але вельмі каштоўную падтрымку - да працы на палях далучаюцца супрацоўнікі МНС

Сярод іх - 21-гадовы Аляксандр Азевіч, вадзіцель Лепельскага раённага аддзела па надзвычайных сітуацыях, які ў вольныя ад службы дні садзіцца за штурвал камбайна ў ААТ "Чарэйшчына".

Для Аляксандра гэта ўжо другі сезон дапамогі роднай гаспадарцы ў гарачую пару жніва. Малады ратавальнік прызнаецца, што такім чынам увасабляе адразу дзве мары: служыць людзям, ратуючы жыцці, і працаваць на магутнай сельскагаспадарчай тэхніцы.

- Калі ёсць магчымасць, заўсёды рады дапамагчы, - кажа Аляксандр. - У МНС мы прывыклі дзейнічаць хутка і зладжана, і гэтая ж адказнасць важная ў полі. Ураджай трэба прыбраць своечасова, і калі магу ўнесці свой уклад - чаму б не?

Гэтае жаданне знаходзіць падтрымку ў начальніка Лепельскага РАНС Івана Маскалькова, які выязджае на поле праверыць умовы працы свайго супрацоўніка, і яшчэ раз пераканацца, якія добрыя і адказныя хлопцы служаць у яго ў аддзеле.

Такая ініцыятыва - не рэдкасць: многія супрацоўнікі МНС у перыяд уборачнай страды падтрымліваюць аграрыяў. Іх навыкі -уважлівасць, дысцыпліна і ўменне працаваць у напружаных умовах - аказваюцца каштоўнымі і на хлебным полі.

У ААТ "Чарэйшчына" дапамогу Аляксандра высока цэняць:

- Такія хлопцы - сапраўдная падмога, - адзначаюць у гаспадарцы. - Яны ведаюць тэхніку, працавітыя і разумеюць, як важна ўсё зрабіць своечасова і ў тэрмін.

Аляксандр паставіў сабе задачу: намалаціць не менш за 1 тысячу тон збожжа за гэтую ўборачную кампанію.

Сумяшчаючы дзве важныя місіі - выратаванне людзей і дапамогу ў забеспячэнні краіны збожжам - супрацоўнікі МНС даказваюць, што іх прафесіяналізм выходзіць далёка за рамкі службы. А для Аляксандра Азевіча гэта яшчэ і магчымасць з гонарам сказаць: "Я і ратавальнік, і хлебароб!"