Падчас візіту беларускай урадавай дэлегацыі ў Ташкент ВНУ Беларусі і Узбекістана падпісалі 10 дакументаў аб супрацоўніцтве, паведамілі БЕЛТА ў пасольстве Беларусі ва Узбекістане.

Дэлегацыі абедзвюх краін правялі перагаворы ў Міністэрстве вышэйшай і сярэдняй спецыяльнай адукацыі Узбекістана. Беларускі бок прадставіў міністр адукацыі Ігар Карпенка, узбекскі - міністр вышэйшай і сярэдняй спецыяльнай адукацыі Абдукадзір Ташкулаў.

У перагаворах удзельнічалі кіраўнікі беларускіх вышэйшых навучальных устаноў: БДУІР, БНТУ, БДТУ, Віцебскага дзяржаўнага ўніверсітэта імя П.М.Машэрава, Гродзенскага дзяржаўнага ўніверсітэта імя Янкі Купалы, Гомельскага дзяржаўнага ўніверсітэта імя Францыска Скарыны, Рэспубліканскага інстытута прафесійнай адукацыі і Рэспубліканскага інстытута вышэйшай школы.

У бліжэйшыя дні беларуская дэлегацыя таксама правядзе перагаворы з міністрамі дашкольнай адукацыі і народнай адукацыі, наведае вышэйшыя і сярэднія ўстановы адукацыі. Бакі ўзгаднілі і плануюць падпісаць план сумесных дзеянняў паміж Міністэрствам адукацыі Беларусі і Міністэрствам вышэйшай і сярэдняй спецыяльнай адукацыі Узбекістана на 2021-2025 гады.

Паміж установамі адукацыі і навуковымі арганізацыямі дзвюх краін заключана ўжо каля 200 прамых дагавораў. Паспяхова функцыянуюць сумесныя факультэты, рэалізуюцца беларуска-ўзбекскія адукацыйныя праграмы, у тым ліку з выдачай двух дыпломаў, адкрыты сумесны Беларуска-ўзбекскі міжгаліновы інстытут прыкладных тэхнічных кваліфікацый у Ташкенце. Акрамя таго, прапрацоўваецца пытанне аб стварэнні Узбекска-беларускага ўніверсітэта матэрыялазнаўства.

У 2020/2021 навучальным годзе адукацыйныя ўстановы Беларусі прынялі амаль 2 тыс. узбекскіх студэнтаў. Экспарт адукацыйных паслуг ва Узбекістан за мінулы год склаў $1,7 млн, павялічыўшыся ў параўнанні з папярэднім амаль на 14 працэнтаў.

БелТА