Беларусь і Расія плануюць падпісаць пагадненне аб парадку прызнання электроннага лічбавага подпісу
Беларусь і Расія плануюць падпісаць міжурадавае пагадненне аб парадку прызнання электроннага лічбавага подпісу, паведамілі БЕЛТА ў Мінсувязі.
Міністр сувязі і інфарматызацыі Беларусі Канстанцін Шульган сустрэўся з міністрам лічбавага развіцця, сувязі і масавых камунікацый Расійскай Федэрацыі Максутам Шадаевым у час візіту беларускай дэлегацыі ў Маскву.
"У мэтах выпрацоўкі перспектыўных напрамкаў двухбаковага супрацоўніцтва кіраўнікі ведамстваў дзвюх краін абмеркавалі актуальны парадак дня, уключаючы падрыхтоўку сумесных прапаноў па выкананні асноўных напрамкаў рэалізацыі палажэнняў Дагавора аб стварэнні Саюзнай дзяржавы на 2024-2026 гады ў сферы сувязі і лічбавізацыі. Акрамя таго, былі разгледжаны пытанні падрыхтоўкі да падпісання міжурадавага пагаднення аб парадку прызнання электроннага лічбавага подпісу, супрацоўніцтва ў галіне паштовай сувязі, а таксама каардынацыі частотных прысваенняў станцыям, якія выкарыстоўваюцца наземнымі радыёслужбамі, і іншае", - расказалі ў Мінсувязі.
Па выніках перагавораў міністрамі ўзгоднены і завізіраваны план па рэалізацыі асноўных напрамкаў рэалізацыі палажэнняў Дагавора аб стварэнні Саюзнай дзяржавы на 2024-2026 гады ў сферы сувязі і лічбавізацыі.