23 жніўня, Віцебск /Вольга Багачова - БЕЛТА/. Аграрыі Віцебскай вобласці завяршылі здачу пшаніцы і жыта ў кошт дзяржзаказу, паведамілі карэспандэнту БЕЛТА ў камітэце па сельскай гаспадарцы і харчаванні Віцебскага аблвыканкама. Усяго гаспадаркам Віцебскай вобласці сёлета неабходна здаць у кошт дзяржзаказу 203 тыс. т збожжа. Па стане на 23 жніўня здадзена 177,2 тыс. т, або 87% да запланаванага. Пры гэтым у першую чаргу аграрыі рэгіёну стараліся выканаць харчовую праграму. Пры дзяржзаказе ў 153 тыс. т харчовага збожжа пастаўлена звыш 93% да задання. Так, на сённяшні дзень выкананы планы па здачы харчовага жыта (пастаўлена 65,8 тыс. т дадзенай культуры) і пшаніцы (80 тыс. т). "У гэтым годзе ўсё жыта ішло харчовае, у ім не было спарыньі. Больш якаснай аказалася і пшаніца, клейкавіна ў збожжы якой складае 23% і вышэй, што адпавядае трэцяму класа. У 2011 годзе яна была ў асноўным чацвёртага класа", - адзначаюць спецыялісты. Нарыхтоўчымі арганізацыямі спіртавой прамысловасці выкананы план у 30 тыс. т па нарыхтоўцы збожжа для вытворчасці спірту. У цяперашні час гаспадаркі вобласці вядуць здачу аўса. Ужо здадзена 1 тыс. т збожжа, або 30%. Частыя дажджы паўплывалі на яго якасць, таму перад здачай аграрыям даводзіцца дапрацоўваць збожжа. Аналагічных намаганняў патрабуе і піваварны ячмень, у якім адзначаецца павышанае ўтрыманне бялку. У бліжэйшы час працаўнікі вёскі прыступяць да ўборкі грэчкі. Дадзенай культуры плануецца паставіць у кошт дзяржзаказу 800 т. Пакуль жа адной з галоўных задач аграрыяў з'яўляецца адгрузка фуражнага збожжа на камбінаты хлебапрадуктаў на вытворчасць камбікармоў для забеспячэння ў міжсезонны перыяд жывёлагадоўчых комплексаў і птушкафабрык вобласці. Па стане на 23 жніўня ў Віцебскай вобласці ўбрана 369,2 тыс. га збожжавых і зернебабовых, або 75,6% плошчаў. Намалочана 1,162 млн. т збожжа з сярэдняй ураджайнасцю 31,5 ц/га. Практычна наблізіліся да завяршэння жніва Чашніцкі і Глыбоцкі раёны, дзе адпаведна ўбрана 94,7% і 91,4% плошчаў. Акрамя таго, ва ўсіх раёнах Віцебскай вобласці завяршыўся сеў азімага рапсу. Дадзеная культура будзе вырошчвацца на 55 тыс. га.

БЕЛТА