20 снежня, Віцебск /Дзіяна Курыла - БЕЛТА/. Чысты прыбытак сельгаспрадпрыемстваў Віцебскай вобласці ў 2012 годзе павінен удвая перавысіць паказчык бягучага года і дасягнуць Br1 трлн. Такі задачы перад аграрыямі паставіў сёння старшыня Віцебскага аблвыканкама Аляксандр Косінец, прадстаўляючы дэпутатам Віцебскага аблсавета праект прагнозу сацыяльна-эканамічнага развіцця рэгіёну на 2012 год, перадае карэспандэнт БЕЛТА. У бягучым годзе з адмоўным фінансавым вынікам спрацавалі ўсяго тры прадпрыемствы. Чысты прыбытак сельгаспрадпрыемстваў па выніках бягучага года складзе каля Br500 млрд. "Грошы трэба зарабляць самім", - падкрэсліў губернатар. З-за нізкай працоўнай і тэхналагічнай дысцыпліны сельская гаспадарка нясе немалыя фінансавыя страты. Так, пры ўборцы збожжавых губляецца каля Br200 млрд., з-за несвоечасовага ўкосу кармоў - прыкладна Br150 млрд., мае месца нерацыянальнае выкарыстанне нафтахімічных матэрыялаў. Развіццё галіны ў 2012 годзе вызначана ў адпаведнасці з рэгіянальнай праграмай "Вітагра". "Аграрыям па сілах узяць вышыню ў 110% тэмпу росту аб'ёмаў сельгасвытворчасці", - лічыць старшыня аблвыканкама. Вобласць запланавала сабраць 1,5 млн.т збожжа. У наступным годзе працягнуцца работы па выхадзе на аптымальную структуру пасяўных плошчаў. Плануецца забяспечыць тэмп росту рэнтабельнасці продажаў у сельскагаспадарчых арганізацыях на ўзроўні 3-3,5%. За кошт уласных сродкаў гаспадарак запланавана рэканструяваць 228 малочна-таварных ферм. Дэпутаты Віцебскага аблсавета адобрылі прагноз сацыяльна-эканамічнага развіцця рэгіёну на 2012 год.-0-

БЕЛТА