Беларуская чыгунка правядзе 19 кастрычніка акцыю "Стоп - заяц!", накіраваную на павышэнне культуры пасажыраў у цягніках, паведамілі БЕЛТА ў прэс-цэнтры БЧ.
Беларуская чыгунка правядзе 19 кастрычніка акцыю "Стоп - заяц!", накіраваную на павышэнне культуры пасажыраў у цягніках, паведамілі БЕЛТА ў прэс-цэнтры БЧ.
Прадстаўнікі Беларускай чыгункі правераць наяўнасць праязных дакументаў у пасажыраў цягнікоў рэгіянальных ліній эканомкласа пры пасадцы або высадцы з цягніка. Удзельнікі акцыі раздадуць пасажырам тэматычныя памяткі. Акрамя работнікаў БЧ, у мерапрыемстве возьмуць удзел супрацоўнікі аддзелаў унутраных спраў на транспарце.
З пачатку года кантралёры-рэвізоры пасажырскіх цягнікоў Беларускай чыгункі правялі 41 513 праверак, што на 271 больш, чым за аналагічны перыяд 2017 года. Асноўная ўвага надавалася цягнікам гарадскіх ліній і рэгіянальных ліній эканомкласа, на долю якіх прыпала 96% ад агульнай колькасці праведзеных праверак.
За 9 месяцаў бягучага года да адміністрацыйнай адказнасці прыцягнута 6 633 безбілетных пасажыраў, з іх 5 662 аплацілі штраф на месцы. За курэнне ў неўстаноўленых месцах аштрафавана 270 чалавек. У выніку кантролю ў цягніках спагнана Br138,4 тыс. штрафу і тарыфу.
У БЧ нагадваюць, што ў цяперашні час штраф за безбілетны праезд у цягніках гарадскіх ліній складае ад 0,5 да 1 базавай велічыні (цяпер базавая велічыня складае Br24,5). Таксама прадугледжана адміністрацыйная адказнасць (штраф у памеры 0,2 базавай велічыні) за неаплачаны правоз ручной паклажы, колькасць або памер якой перавышаюць устаноўленыя заканадаўствам нормы бясплатнага правозу (вагой больш за 36 кг альбо памерам, які перавышае па суме трох вымярэнняў 200 см). Штраф за безбілетны праезд пасажыраў у цягніках рэгіянальных ліній складае 0,7 базавай велічыні, у міжрэгіянальных і міжнародных лініях - 1 базавую. За курэнне ў неўстаноўленых месцах прадугледжаны штраф да 4 базавых.