III Беларуска-узбекскі жаночы бізнес-форум, які пройдзе 2-3 верасня, стане яркай падзеяй міжнароднага жыцця не толькі Віцебскага рэгіёна, але і ўсёй нашай краіны. У гэтым упэўнены старшыня аблвыканкама Аляксандр Субоцін напярэдадні сустрэчы гасцей, які пагутарыў з журналістамі.
– Мы чакаем новых кантрактаў, наладжванне новых сувязяў для стварэння больш трывалага падмурка пад будучыя сумесныя праекты. Узбекістан з'яўляецца адным з асноўных нашых партнёраў у свеце, нягледзячы на адлегласці, што раздзяляюць нашы краіны. У нас вельмі падобная ментальнасць, слаўнае савецкае мінулае дазваляе хутка знаходзіць агульную мову і прасоўваць сумесныя праекты. Напрыклад, з удзелам холдынгу «Марка» ва Узбекістане створана сумеснае прадпрыемства «Узбекшуз», абутак якога карыстаецца папулярнасцю ва ўсёй Сярэдняй Азіі. «ПА Энергакомплект» сумесна з узбекскім партнёрам вядзе будаўніцтва завода па вытворчасці меднага дроту і кабеля малога сечання. Намячаюцца праекты ў лёгкай прамысловасці.
Існуе прадуктыўнае міжвузаўскае супрацоўніцтва. У прыватнасці, паміж Віцебскай дзяржаўнай акадэміяй ветэрынарнай медыцыны і Самаркандскім дзяржаўным універсітэтам ветэрынарнай медыцыны, жывёлагадоўлі і біятэхналогіі.
Чакаецца вялікая колькасць гасцей, будуць прадстаўлены выставы прадукцыі – ад харчовай прамысловасці да ювелірных вырабаў. У дзелавой частцы пройдзе пленарнае пасяджэнне, будуць дзейнічаць сем рабочых секцый.
На палях форуму чакаецца падпісанне вялікай колькасці дакументаў, ад Віцебскай вобласці – мінімум чатыры камерцыйныя кантракты і мемарандум аб супрацоўніцтве паміж нашымі гарадамі-пабрацімамі.