Аляксандр Субоцін правёў рабочыя сустрэчы з кіраўнікамі дыпламатычных місій Бразіліі і Кітая

Для Надзвычайнага і Паўнамоцнага Пасла Бразільскай Рэспублікі ў Рэспубліцы Беларусь спадара Бернарда Жоржа Леопольда дэ Гарсія Клінгда цяперашняя паездка стала першым афіцыйным візітам на Віцебшчыну. Акрамя перамоваў з Аляксандрам Субоціным, пасол прыняў удзел у адкрыцці выставачнай экспазіцыі «Спатканне з Бразіліяй» у Мастацкім музеі, якая пачала працаваць 12 ліпеня. Таксама ў праграме паездкі – наведванне УП «Полімерканструкцыя», УП «Вітбудтэхмаш» і Аршанскага льнокамбіната.

У апошнія гады супрацоўніцтва Віцебшчыны з кітайскімі рэгіёнамі нязменна захоўвае добрую дынаміку развіцця. Тэма паглыблення ўзаемадзеяння стала лейтматывам сустрэчы Аляксандра Субоціна з Надзвычайным і Паўнамоцным Паслом Кітайскай Народнай Рэспублікі ў Рэспубліцы Беларусь Се Сяоюнам.

У 2023 годзе прадпрыемствы вобласці пастаянна наведваюць Паднябесную ў пошуку неабходнага абсталявання і сучасных тэхналогій. Напрыклад, у маі для прадпрыемстваў Віцебскага канцэрна «Мяса-малочныя прадукты» была арганізавана бізнес-місія для ўстанаўлення кантактаў з вытворцамі сучасных упаковачных матэрыялаў, ліній абвалкі мяса, маразільных энергазберагальных установак.

На пачатку лета дэлегацыя Віцебшчыны прыняла ўдзел у Харбінскай кірмашы. Як паведамілі ў камітэце эканомікі аблвыканкама, па выніках паездкі ў актыве віцебскіх вытворцаў – дамоўленасці аб правядзенні перамоваў у III квартале бягучага года з прадпрыемствамі нафтахімічнай галіны, фармацэўтыкі. Таксама дасягнуты дамоўленасці аб візіце кітайскіх кампаній на Віцебшчыну для азнаямлення з патрэбамі па мадэрнізацыі прадпрыемстваў малочнай галіны рэгіёну. На пачатку чэрвеня прадстаўнікі кітайскай машынабудаўнічай кампаніі наведалі Глыбоцкі і Віцебскі мясакамбінаты, а таксама Глыбоцкі малочнакансервавы камбінат. Цяпер у прапрацоўцы ў віцебскіх перапрацоўчых прадпрыемстваў – тэхналогіі па выпуску парашка для вырабу марожанага, сухога малака ў выглядзе таблетак, цукерак, ультрапастэрызаванага малака з працяглым тэрмінам захоўвання. Акрамя таго, у 2023 годзе ў Аршанскім раёне зарэгістраваны дзве прыватныя кампаніі, якія маюць намер развіваць вытворчасць курыных лапак пад патрэбы кітайскага рынку.

Добрую аснову для ўмацавання эканамічнага ўзаемадзеяння ствараюць міжрэгіянальныя сувязі, якія таксама развіваюцца актыўна. У ліку партнёрскіх рэгіёнаў, з якімі ўстаноўлены пабрацімскія сувязі, – правінцыі Хэйлунцзян, Шаньдун, Гуйчжоу, Цзянсі, а таксама шэраг гарадоў і адміністрацыйных раёнаў правінцый. КАкрамя таго, па выніках візіту ў Харбін такія адносіны зацікаўлены ўсталяваць Наваполацк і Дацын.
Дэлегацыі правінцый Гуйчжоу і Хэйлунцзян прынялі ўдзел у мерапрыемствах эканамічнага форуму ў Віцебску ў маі 2023 года. Падпісаны мемарандумы аб супрацоўніцтве з прадпрыемствамі мяса-малочнай галіны і Дубровенскім ільнозаводам.
З 2021 года кратна павялічылася колькасць кантактаў паміж універсітэтамі, у кожнага ўніверсітэта вобласці сёння ўстаноўлены сувязі як мінімум з пяццю ўніверсітэтамі і каледжамі правінцый КНР. У 2023 годзе прадстаўнікі ўсіх універсітэтаў наведалі Кітай з дзелавымі візітамі, на дадзеным этапе прапрацоўваюцца пытанні павелічэння колькасці студэнтаў і магістрантаў з Паднябеснай. Акрамя таго, магчымасці стварэння Цэнтра традыцыйнай кітайскай медыцыны ў Віцебску абмяркоўваюцца з універсітэтам правінцыі Гуйчжоу.

Таксама падпісаны пагадненні аб супрацоўніцтве з Дэманстрацыйнай зонай Кітай — ШАС горада Цындаа, пабрацімам якога з'яўляецца Орша. Гэта стварыла аснову для абмеркавання зместу і ўмоў рэалізацыі міжрэгіянальных праграм, арганізацыі бізнес-місій дзелавых колаў. Да канца бягучага года ўжо запланаваны візіты дэлегацый правінцый Шаньдун і Цзянсі на Віцебшчыну.