1 верасня, Мінск /Таццяна Паляжай - БЕЛТА/. Галоўнай задачай у палітыцы Беларусі заўсёды была, ёсць і будзе клопат пра кожнага чалавека, няхай гэта будзе дарослы ці дзіця. Пра гэта заявіў сёння Прэзідэнт Беларусі Аляксандр Лукашэнка, адкрываючы новую школу ў вёсцы Бараўляны Мінскага раёна, перадае карэспандэнт БЕЛТА.
"Якія б цяжкасці мы ні перажывалі, галоўнай тэмай парадку дня ў палітыцы Беларусі заўсёды была, ёсць і будзе клопат пра чалавека, малога, вялікага, дзіцяці, дарослага, - гэта наша палітыка", - сказаў Прэзідэнт.
"У свеце існуе нямала розных крытэрыяў вызначэння ўзроўню развіцця і дабрабыту дзяржаў. Але сапраўднае шчасце, пагадзіцеся, залежыць ад простых і па-сапраўднаму вечных каштоўнасцей - здароўя, любімай сям'і, утульнага дома, магчымасці атрымаць добрую адукацыю і мець годнае працу. І для мяне як Прэзідэнта важны стан менавіта гэтых паказчыкаў і не нейкіх іншых лічбаў", - падкрэсліў кіраўнік дзяржавы.
Аляксандр Лукашэнка адзначыў добрую тэндэнцыю павелічэння колькасці сем'яў і нараджальнасці, што ў сваю чаргу абумоўлівае развіццё эканомікі, жыллёвага будаўніцтва, стварэння новых працоўных месцаў. "Іншымі словамі, Беларусь расце, маладзее і ўпэўнена глядзіць у будучыню", - сказаў ён. "Упэўнены, калі б па гэтым крытэрыі ацэньваліся дзяржавы, то наша краіна магла б прэтэндаваць на самы высокі рэйтынг у свеце", - лічыць кіраўнік дзяржавы.
Па яго словах, ужо стала добрай традыцыяй 1 верасня адкрываць новыя школы. Цяперашні Дзень ведаў стаў днём нараджэння адразу для чатырох новых школ. На думку Прэзідэнта, у школы ў Бараўлянах самая цікавая гісторыя. Марай аб новай школе з кіраўніком дзяржавы ў канцы 2007 года падзяліліся мамы і выхаванцы Бараўлянскай дзіцячай вёскі. Дзеці з гэтай і навакольных населеных пунктаў вымушаны былі цесніцца ў навучальных установах суседзкага пасёлка Лясны. "Я сваё абяцанне выканаў, цяпер справа за вамі, - сказаў Аляксандр Лукашэнка. - Галоўнае, каб школа стала цэнтрам падрыхтоўкі разумных, прыгожых, таленавітых і моцных дзяцей, адданых нашай краіне. Нам гэта вельмі трэба. Па такім шляху мы і будзем рухацца".
Гэты год для некаторых дзетак стане памятным падвойне, паколькі яны не толькі атрымалі ў падарунак новую школу, але і нарэшце знайшлі сям'ю і ўласны дом у дзіцячай вёсцы "Вытокі", сказаў Прэзідэнт. "Для нас няма чужых дзяцей. Дзяржава ў адказе за іх лёс, і мы разам павінны зрабіць усё неабходнае, каб кожнае наша дзіця знайшло сваю сям'ю", - падкрэсліў кіраўнік дзяржавы.
Звяртаючыся да дзяцей, Аляксандр Лукашэнка заклікаў берагчы іх новы школьны дом, а настаўнікам з дапамогай майстэрства, захопленасці сваім прадметам і любові да дзяцей знайсці шлях да сэрца кожнага дзіцяці, абудзіць у вучнях прагу пазнання.
Прэзідэнт Беларусі Аляксандр Лукашэнка яшчэ ў 2007 годзе пры наведванні "SOS-Дзіцячай вёскі" у Бараўлянах паведаміў, што ў краіне разгорнута праграма па перасяленні дзяцей-сірот з дамоў-інтэрнатаў у сем'і, дамы, дзіцячыя вёскі, у аснове якіх ляжыць сямейны падыход да апекі над дзецьмі. Калі ў 2007 годзе ў Беларусі было 71 сіроцкая ўстанова ў сістэме адукацыі, то ў цяперашні час іх засталося 57 - на 20% менш. Колькасць дзяцей, якія ўтрымліваюцца ў іх, за два гады скарацілася на 25%. На думку спецыялістаў Мінадукацыі, гэта вельмі добры паказчык.-0-
БЕЛТА