7 лютага, Мінск /Кар. БЕЛТА/. Прэзідэнт Беларусі Аляксандр Лукашэнка лічыць, што на працягу года-паўтары ўзровень заработнай платы насельніцтва можа вярнуцца на дакрызісны ўзровень. Такое меркаванне ён выказаў 6 лютага, прымаючы з дакладам старшыню праўлення Нацыянальнага банка Надзею Ермакову, паведамілі БЕЛТА ў прэс-службе беларускага лідара. "Пры нармальным функцыянаванні эканомікі, і калі нармальна будуць працаваць працоўныя калектывы, мы на працягу года-паўтары гадоў не проста вернемся на ранейшыя пазіцыі па заработнай плаце людзей, але мы можам іх і перасягнуць, - сказаў кіраўнік дзяржавы. - У нас ёсць магчымасць зарабіць нармальныя грошы для таго, каб людзі адчулі паляпшэнне жыцця, і гэта ўжо адбываецца. І я думаю, што калі мы нармальна выйдзем з гэтай няпростай зімы, я маю на ўвазе, каб не давялося перасяваць пасевы з-за маразоў і так далей, то мы знойдзем гэтыя грошы". "Але мы ні ў якім разе не павінны друкаваць грошы, гэта абсалютна выключана", - падкрэсліў Прэзідэнт. Кіраўнік дзяржавы праінфармаваны аб стане спраў на валютным рынку, сітуацыі з крэдытаваннем эканомікі, у тым ліку будаўніцтва жылля, іншых дзяржпраграм. "Павінен сказаць, што пакуль нядрэнна працуеце з банкірамі і ўрадам у плане выканання тых праграм, якія мы намячалі, для таго, каб стабілізаваць абстаноўку", - адзначыў Аляксандр Лукашэнка. Паводле яго слоў, сітуацыя ў цяперашні час у эканоміцы краіны стабільная. "Мы ў гэты час, наколькі я інфармаваны, не марнавалі золатавалютныя рэзервы, наадварот, яны ў нас прыраслі, і ў нас ёсць магчымасць іх павялічыць. Іншае пытанне сёння ўстае, каб нам лішнія грошы не трымаць усё ж такі ў рэзервах - яны павінны працаваць у эканоміцы. Але тым не менш колькі трэба, столькі павінна быць для таго, каб у нас каталізмаў у перспектыве не было", - сказаў Прэзідэнт. Аляксандр Лукашэнка звярнуў таксама ўвагу на высокую стаўку банкаў па выдаваемых крэдытах. "Вельмі дарагія крэдытныя рэсурсы. Эканоміка, натуральна, цярпець такую сітуацыю з крэдытамі доўга не можа, - сказаў Аляксандр Лукашэнка. - Таму стаўка рэфінансавання Нацыянальнага банка паціху-паціху павінна зніжацца. Мы павінны даваць і сігналы нармальныя эканоміцы нашай краіны, суб'ектам гаспадарання, ды і фактычна стаўка павінна быць ніжэй, таму што пры цяперашняй гаварыць аб нейкім інтэнсіўным развіцці эканомікі нельга".