А. Лукашэнка: АДКБ здольная значна павысіць эфектыўнасць забеспячэння рэгіянальнай бяспекі

31 мая, Мінск /Кар. БЕЛТА/. Арганізацыя Дагавора аб калектыўнай бяспецы можа значна павысіць міжнародны аўтарытэт і сваю значнасць як рэгіянальнай структуры, што эфектыўна падтрымлівае бяспеку на постсавецкай прасторы. Аб гэтым заявіў 31 мая Прэзідэнт Беларусі Аляксандр Лукашэнка на сустрэчы з кіраўнікамі дэлегацый, якія ўдзельнічаюць у пасяджэнні Савета міністраў замежных спраў дзяржаў - членаў АДКБ, паведамілі БЕЛТА ў прэс-службе беларускага лідара. Аляксандр Лукашэнка перакананы, што ўмацаванне арганізацыі адпавядае інтарэсам усіх без выключэння дзяржаў-членаў. Беларусь у якасці старшыні АДКБ імкнецца ўнесці свой уклад у гэты працэс. Менавіта на гэта і накіраваны вылучаныя краінай ініцыятывы на мінулай сесіі Савета калектыўнай бяспекі. "Прапанаваныя намі напрамкі дзейнасці - гэта патрабаванні сучаснай геапалітычнай сітуацыі, а не выдумка Беларусі", - падкрэсліў кіраўнік беларускай дзяржавы. Прэзідэнт разлічвае, што праца па рэалізацыі беларускіх прапаноў сумесна з партнёрамі па арганізацыі будзе ўзгодненай і плённай, паслужыць на карысць краін. На думку Аляксандра Лукашэнкі, сітуацыя ў Паўночнай Афрыцы і на Блізкім Усходзе, іншых кропках прамоўна сведчыць аб важнасці рэгіянальнага фармату бяспекі. "Нестабільнасць у адной дзяржаве здольна выклікаць эскалацыю напружанасці і дэстабілізацыю ў суседніх краінах. Адсутнасць скаардынаванай палітыкі і дакладна выбудаванай сістэмы калектыўнай бяспекі, на вялікі жаль, часта прыводзіць да катастрафічных наступстваў", - адзначыў беларускі лідар. Аляксандр Лукашэнка лічыць, што ў гэтых умовах асаблівую важнасць набывае каардынацыя дзеянняў дзяржаў-членаў на міжнароднай арэне. "Менавіта міністры замежных спраў павінны адыгрываць ключавую ролю ў збліжэнні пазіцый, выпрацоўцы адзіных падыходаў і адстойванні агульных інтарэсаў", - сказаў кіраўнік беларускай дзяржавы. Ён выказаў упэўненасць, што сумеснымі намаганнямі дзяржаў АДКБ удасца здзейсніць якасны рывок у забеспячэнні бяспекі на постсавецкай прасторы. На думку Аляксандра Лукашэнкі, для гэтага патрэбны палітычная воля, узаемны давер і гатоўнасць ісці на пэўныя кампрамісы дзеля аб'яднання сіл. "Перакананы, што ўсе гэтыя кампаненты ёсць у дзяржаў - членаў АДКБ", - падкрэсліў ён.

Аляксандр Лукашэнка яшчэ раз адзначыў, што "ініцыятывы, якія, можа быць, на першы погляд і вельмі востра пастаўлены, - гэта не выдумка Беларусі, а ўсё тое, што ўжо набалела". "Камусьці трэба было паставіць гэтыя пытанні на першае месца, калі мы лічым, што гэтая арганізацыя не толькі адбылася, але і мае перспектывы свайго развіцця", - сказаў беларускі лідар. Прэзідэнт падкрэсліў, што мае намер настойліва прасіць разгледзець беларускія ініцыятывы, каб у далейшым весці па іх канкрэтную працу, каб яна не вялася дарма і "не вылучаліся ініцыятывы дзеля ініцыятыў". Гаворачы аб пасяджэнні Савета міністраў замежных спраў АДКБ, якое адбылося, Аляксандр Лукашэнка выказаў упэўненасць, што яно павінна паспрыяць вырашэнню актуальных задач і далейшаму развіццю супрацоўніцтва дзяржаў - членаў АДКБ у найважнейшых сферах жыццядзейнасці. Прэзідэнт указаў на неабходнасць узмацняць падтрымку краінамі - удзельніцамі АДКБ адна адной на міжнароднай арэне. Гэта таксама будзе служыць умацаванню арганізацыі як эфектыўнага міжнароднага інстытута. У ходзе сустрэчы кіраўнік беларускай дзяржавы падрабязна праінфармаваў кіраўнікоў дэлегацый аб стане спраў у краіне, эканамічнай сітуацыі і дзеяннях улады па стабілізацыі абстаноўкі. У сваю чаргу генеральны сакратар АДКБ Мікалай Бардзюжа азнаёміў Прэзідэнта Беларусі з падрабязнасцямі пасяджэння і прынятымі ў выніку яго рашэннямі. Па словах Мікалая Бардзюжы, было разгледжана вялікая колькасць пытанняў. "Мы зыходзім з таго, што сёння галоўная задача - гэта не стварэнне нарматыўнай базы і не падрыхтоўка чарговых дакументаў, а адладка існуючых механізмаў і рэалізацыя практычнага супрацоўніцтва", - сказаў ён. Пытанні парадку дня датычыліся ацэнкі сітуацыі, тэндэнцыі развіцця абстаноўкі з улікам тых працэсаў, якія адбываюцца на Блізкім Усходзе, у Паўночнай Афрыцы, у дзяржавах АДКБ. Акрамя таго, была абмеркавана тэматыка знешнепалітычнай каардынацыі. Па словах Мікалая Бардзюжы, гэтая праца дастаткова добра адладжана, аднак па многіх прычынах не заўсёды дасягаюцца патрэбныя вынікі. На пасяджэнні ішла размова і аб рабоце па процідзеянні сучасным выклікам і пагрозам. У дзяржаў АДКБ ёсць добрыя вынікі дзейнасці па прадухіленні незаконнай міграцыі, абароту наркотыкаў, па лініі інфармацыйнай бяспекі, каардынацыі ў сферы ліквідацыі надзвычайных сітуацый.Як адзначыў Мікалай Бардзюжа, асаблівая ўвага надавалася пытанням, звязаным з рэалізацыяй такіх ініцыятыў, агучаных Беларуссю на маскоўскай сесіі ў снежні 2010 года, як міратворчасць і інстытут партнёрства. Генсек АДКБ распавёў, што шмат зроблена па міратворчай дзейнасці, праведзены кансультацыі ў ААН. Што тычыцца інстытута партнёрства, то, па словах Мікалая Бардзюжы, на практыцы такая праца ўжо вядзецца. Гаворачы пра механізмы крызіснага рэагавання, Мікалай Бардзюжа распавёў, што выявіўся шэраг праблем пры іх адпрацоўцы. У прыватнасці, гэта датычыцца працы маніторынгавай групы, праходжання тэрміновых дакументаў у апаратах прэзідэнтаў, тэрміновага склікання сесіі Савета калектыўнай бяспекі, неабходнасці абмеркавання крызіснай сітуацыі, напрыклад, праз стварэнне відэаканферэнцый.-0-

БЕЛТА