А. Лукашэнка даручыў ураду выпрацаваць ясную і дакладную сістэму падтрымкі шматдзетных сем'яў

5 сакавіка, Мінск /Уладзімір Мацвееў – БЕЛТА/. Прэзідэнт Беларусі Аляксандр Лукашэнка даручыў ураду выпрацаваць ясную і дакладную сістэму падтрымкі шматдзетных сем'яў. Пра гэта кіраўнік дзяржавы заявіў сёння на цырымоніі ўручэння дзяржаўных узнагарод беларускім жанчынам, перадае карэспандэнт БЕЛТА. "Ураду даручана ў пачатку гэтага года ў сувязі з фінансавымі няўдачымі мінулага года выпрацаваць нармальную, ясную і зразумелую сістэму падтрымкі шматдзетных сем'яў, - сказаў Аляксандр Лукашэнка. - Гэту дапамогу трэба зрабіць дакладнай, адраснай, і мы гэта зробім у бліжэйшы час. На першым месцы будзе жыллё, каб і на вёсцы, і ў горадзе шматдзетная сям'я мела дах над галавой". Прэзідэнт падкрэсліў, што дапамога шматдзетным сем'ям павінна быць прыярытэтам у дзейнасці дзяржавы. "Яна не павінна быць размазанай. Лічу, што шматдзетную сям'ю трэба падтрымаць у галоўным і ў той момант, калі трэба. Гэта момант нараджэння дзіцяці", - сказаў беларускі лідар. "Перш за ўсё нам трэба, каб у шматдзетнай сям'і быў дах над галавой - гэта галоўнае. У сям'і павінен быць дом. А калі яшчэ дом на зямлі, з дзесяццю-пятнаццаццю сотках, то яны забяспечаць сябе і выгадуюць нармальных дзяцей", - лічыць кіраўнік дзяржавы. Што тычыцца сферы аховы здароўя, Аляксандр Лукашэнка адзначыў, што Беларусь у цяперашні час выйшла на самыя высокія рубяжы ў свеце ў пытаннях родадапамогі і догляду за дзецьмі. "Калі толькі бацькі не празевяць, у нас не можа памерці дзіця. Мы выцягваем любога", - адзначыў Прэзідэнт. Аднак, на думку кіраўніка дзяржавы, аказваючы дзяржаўную падтрымку, неабходна вытрымліваць правільны баланс. "Дапамагаючы, заўсёды трэба шукаць залатую сярэдзіну, каб гэтая дапамога не адхіліла саміх бацькоў ад таго, каб працаваць на сваіх дзяцей. Раней жа ніхто нікому не дапамагаў, а ў сем'ях было не менш за 6-7 дзяцей. І тады ўсе бацькі дбалі пра сваіх дзяцей. Яны іх раслі і выхоўвалі працавітых людзей", - адзначыў Аляксандр Лукашэнка. У якасці прыярытэтнай задачы Аляксандр Лукашэнка назваў забеспячэнне дэмаграфічнай бяспекі дзяржавы. "Калі ў нас не будзе дастатковай колькасці насельніцтва, мы ніколі не ўтрымаем гэту зямлю ў цэнтры Еўропы, на якую замахваюцца ўсе. Таму што гэта лакамы кавалак нашай планеты. А ўтрымаць яе можна толькі дзякуючы людзям - насельніцтву. Таму дэмаграфічная бяспека вельмі важная", - падкрэсліў Прэзідэнт.

Ён адзначыў, што для забеспячэння дэмаграфічнай бяспекі ў краіне прымаецца комплекс мер па ўзмацненні сацыяльна-эканамічнай падтрымкі сем'яў з дзецьмі. Павялічваюцца памеры выплат пры нараджэнні дзіцяці, паляпшаюцца жыллёвыя ўмовы для шматдзетных і маладых сем'яў. "Шмат робіцца, каб у нашай краіне нараджалася як мага больш дзяцей. Каб яны раслі здаровымі, моцнымі, адукаванымі і добра падрыхтаванымі да самастойнага жыцця. Такая палітыка прыносіць станоўчыя вынікі. У апошнія гады ўдалося пераадолець негатыўныя тэндэнцыі скарачэння нараджальнасці. Нават у вельмі няпростым 2011 годзе ў Беларусі з'явілася на свет каля 110 тыс. дзяцей - гэта самы высокі паказчык за дзесяцігоддзе", - канстатаваў беларускі лідар. Па яго словах, не выпадкова, што найбольшую групу запрошаных на цырымонію ўручэння дзярзнагарод склалі шматдзетныя маці, якія ўдастоены ордэнаў за нараджэнне і выхаванне пяці і больш дзяцей. "Гэта сведчанне асаблівай увагі і павагі да вас з боку дзяржавы. Няма важнейшай і ганаровейшай для жанчын місіі, чым мацярынства, нараджэнне і выхаванне дзяцей, беражлівае стаўленне да сямейных каштоўнасцей, - упэўнены Аляксандр Лукашэнка. - Моцная сям'я, здаровыя дзеці - гэта не толькі шчасце бацькоў, але і аснова дабрабыту краіны і яе надзейнай будучыні". Прэзідэнт з задавальненнем адзначыў, што за апошнія 15 гадоў 6 891 жанчына ўзнагароджана ордэнам Маці. Як адзначыў Аляксандр Лукашэнка, шчырай падзякі заслугоўваюць і жанчыны-працаўніцы, чые поспехі таксама былі адзначаны высокімі ўзнагародамі: "У розных галінах дзейнасці праяўляюць яны свае здольнасці і таленты. Але асабліва значная іх роля ў сістэме дашкольнага выхавання, сярэдняй і вышэйшай адукацыі". "У дзіцячых садках, школах, каледжах і ВНУ вы аддаеце падрастаючаму пакаленню і моладзі часцінку сваёй душы, веды, вопыт, клопат і чуласць. Вы фарміруеце лепшыя чалавечыя і грамадзянскія якасці. Гэта сапраўдная руплівая праца і прызванне педагогаў", - сказаў кіраўнік дзяржавы. Жанчынам таксама належыць важкі ўклад у сферы мастацтва. "Сёння тут прадстаўлена наша галоўная ўстанова культуры - Нацыянальны акадэмічны Вялікі тэатр оперы і балета. Пасля рэканструкцыі ён атрымаў другое дыханне і карыстаецца вялікай папулярнасцю ў гледачоў, маючы добрыя перспектывы развіцця", - адзначыў Аляксандр Лукашэнка.Прэзідэнт падкрэсліў, што ў Беларусі ёсць усе ўмовы для раскрыцця талентаў людзей творчых прафесій. "Калі ты таленавіты, то цябе заўважаць. І як бы на нас ні ціснулі, з талентамі лічацца", - сказаў ён. Вытворчую сферу краіны на цырымоніі прадстаўлялі спецыялісты адкрытага акцыянернага таварыства "Амкадор". "Яны заслужылі Падзяку Прэзідэнта за тыя поспехі, якія належаць толькі ім. У сённяшніх умовах гэта асабліва важна і заслугоўвае ўсялякай падтрымкі", - падкрэсліў беларускі лідар. Аляксандр Лукашэнка таксама адзначыў заслугі беларускіх жанчын у такой важнай сферы, як забеспячэнне закона і парадку ў дзяржаве, прававым выхаванні насельніцтва: "Асаблівая роля тут адводзіцца нашаму судзейскаму корпусу, лепшых прадстаўнікоў якога мы ўшаноўваем і высока цэнім". Кіраўнік дзяржавы павіншаваў усіх жанчын з надыходзячым вясеннім святам, пажадаў ім шчасця, дабрабыту, здароўя, любові, новых поспехаў і ўзнагарод. "Асабліва здароўя вашым дзецям, сапраўдным і, я вельмі спадзяюся, будучым", - дадаў Прэзідэнт.-0-

БЕЛТА