18 ліпеня, Мінск /Кар. БЕЛТА/. Прэзідэнт Беларусі Аляксандр Лукашэнка 18 ліпеня правёў рабочую сустрэчу з генеральным пракурорам Рыгорам Васілевічам, паведамілі карэспандэнту БЕЛТА ў прэс-службе беларускага лідара. Генпракурор далажыў кіраўніку дзяржавы аб рабоце праваахоўных органаў у першым паўгоддзі 2011 года. Асаблівая ўвага надавалася стану спраў у крымінагеннай сферы. Так, за першае паўгоддзе колькасць злачынстваў скарацілася амаль на 14% у параўнанні з аналагічным перыядам мінулага года. Значна зменшылася колькасць асабліва цяжкіх злачынстваў, рабаванняў, рабаўніцтваў, хуліганстваў. На 18% скарацілася колькасць злачынстваў сярод непаўналетніх. Як адзначыў Рыгор Васілевіч, гэтай пазітыўнай тэндэнцыі ўдалося дамагчыся дзякуючы сумеснай рабоце праваахоўных органаў і мясцовых улад. Іншы важны аспект – гэта работа па тлумачэнні дзеючага заканадаўства сярод грамадзян, у працоўных калектывах. Аляксандр Лукашэнка звярнуў увагу, што ў гэтай сферы кіраўнікі шэрагу рэспубліканскіх органаў, якія займаюцца прававым забеспячэннем і рэалізацыяй права, не дапрацоўваюць і не выступаюць дастаткова актыўна ў СМІ. У якасці асобнага пытання была абмеркавана праблема росту выпадкаў кіравання транспартам у нецвярозым стане. Колькасць кіроўцаў, якія прыцягваліся да крымінальнай адказнасці за кіраванне ў нецвярозым стане, за паўгоддзе павялічылася больш чым на 20%. Прэзідэнт даручыў у бліжэйшы час знайсці больш эфектыўныя меры адказнасці за кіраванне транспартам у нецвярозым стане, каб забяспечыць большую бяспеку на дарогах.-0-

БЕЛТА