А. Лукашэнка запатрабаваў завяршыць уборачную кампанію да канца наступнага тыдня

8 кастрычніка, Мінская вобласць /Кар. БЕЛТА/. Мясцовым уладам у Беларусі неабходна надаць максімальную ўвагу якаснай закладцы ўраджаю агародніны і садавіны на захоўванне. Пра гэта 7 кастрычніка падчас рабочай паездкі ў Мінскую вобласць заявіў Прэзідэнт Беларусі Аляксандр Лукашэнка, паведамілі карэспандэнту БЕЛТА ў прэс-службе беларускага лідара. Кіраўніку дзяржавы далажылі аб ходзе восеньскіх палявых работ у Беларусі і рэгіёне, выкананні яго даручэнняў па арганізацыі вытворчасці і захоўвання, а таксама аб ходзе нарыхтоўкі бульбы і іншай агародніны. Аляксандр Лукашэнка запатрабаваў завяршыць уборку асноўных сельгас культур да канца наступнага тыдня. Гаворачы аб уборцы бульбы, ён сказаў: "Трэба на наступным тыдні завяршыць уборку бульбы. Будзе недаравальна, калі мы пры такіх цэнах і попыце на рынку пакінем на полі бульбу". Што тычыцца ўборкі кукурузы на зерне, то яе, па словах кіраўніка дзяржавы, неабходна завяршыць на працягу тыдня. "Давайце дамовімся, гэты тыдзень і наступны - і мы з уборкай скончылі", - сказаў Прэзідэнт, звяртаючыся да чыноўнікаў. Пры гэтым ён адзначыў, што яшчэ трэба шмат працы па ўздыманні зябi. Па стане на 6 кастрычніка ў сельгасарганізацыях сяўба азімых збожжавых завершана ва ўсіх абласцях рэспублікі. Пасеяна 1551 тыс.га, што складае 107% плана і на 114 тыс.га больш у параўнанні з 2009 годам. Бульба ўбрана на плошчы 41,6 тыс.га (85% плошчы, якая падлягае ўборцы). З убранай плошчы атрымана 782,1 тыс.т бульбы пры сярэдняй ураджайнасці амаль 188 ц/га. Цукровыя буракі ўбраны на плошчы 40,6 тыс.га (42% плошчы). Накапана 1590,8 тыс.т цукровых карняплодаў пры ўраджайнасці 392 ц/га. Прэзідэнт пацікавіўся станам цэн на бульбу. Як далажыў віцэ-прэм'ер Іван Бамбіза, у цяперашні час гэтая культура экспартуецца па цане Br1300 за кілаграм. Пры гэтым ён паведаміў, што ёсць просьба з боку сельгасарганізацый аб зніжэнні цаны на бульбу. Аднак кіраўнік дзяржавы засумняваўся ў мэтазгоднасці гэтага, улічваючы высокі попыт на бульбу на рынку. "Тое, што не бяруць па гэтай цане, трэба пакласці ў сховішчы і прадаць вясной, зімой, калі заўгодна", - сказаў Аляксандр Лукашэнка.

Кіраўнік дзяржавы падкрэсліў неабходнасць забеспячэння належных умоў захоўвання ўраджаю агародніны і садавіны. Наведваючы нядаўна Нясвіжскі раён, Прэзідэнт ужо даваў даручэнне знайсці пустыя памяшканні пад бульбу, бо захоўванне ўраджаю гэтай культуры ў буртах прыводзіць да страт да 40%. Аляксандр Лукашэнка пацікавіўся, як выконваецца даручэнне. На гэта старшыня Мінаблвыканкама Барыс Батура адказаў, што падбор памяшканняў пад сховішчы вядзецца інтэнсіўна, а калі дзесьці і ўжываецца захоўванне ў буртах, то толькі ў якасці часовай меры. "Усе затраты, якія вы панясеце па перавозках, акупяцца", - адзначыў Аляксандр Лукашэнка. Барыс Батура таксама далажыў кіраўніку дзяржавы аб тым, што валавы збор бульбы ў Мінскай вобласці ў бліжэйшыя 5 гадоў плануецца павялічыць удвая. Калі ў гэтым годзе пры ўраджайнасці прыкладна 215 ц/га плануецца сабраць каля 300 тыс.т бульбы, то ў 2015 годзе пры ўраджайнасці каля 340 ц/га гэтая лічба павінна ўзрасці да 610 тыс.т. Намечана таксама за дадзены перыяд павялічыць пасяўныя плошчы пад гэтую культуру з 13,7 тыс.га да 18 тыс.га. У гэтым годзе выручка ад продажу бульбы сельгаспрадпрыемствамі Мінскай вобласці павінна скласці Br170-180 млрд. Аляксандра Лукашэнку праінфармавалі і аб вытворчасці ў цэлым агародніны ў Мінскай вобласці. Было адзначана, што 80% іх вырошчваецца ў буйных сельгаспрадпрыемствах. Кіраўніку дзяржавы былі прадэманстраваны ўзоры агародніннай прадукцыі, якая выпускаецца ў Мінскай вобласці, у тым ліку той, якую вырабляюць перапрацоўчыя заводы. Прэзідэнт азнаёміўся з пытаннямі арганізацыі вытворчасці і захоўвання бульбы і іншых агародніны ў вобласці на прыкладзе Капыльскага раёна, у прыватнасці ААТ "Старыца-Агра", якое ў тым ліку займаецца бульбаводствам па інтэнсіўнай тэхналогіі. Валавая вытворчасць бульбы ў гэтай гаспадарцы ў 2010 годзе чакаецца на ўзроўні 8 тыс. 200 т пры ўраджайнасці 410 ц/га, што складае 40% у агульным аб'ёме вытворчасці бульбы ў раёне. Частку ўраджаю сельгаспрадпрыемства рэалізуе ў Татарстан. Ад продажу бульбы ў гэтым годзе "Старыца-Агра" плануе атрымаць каля Br5 млрд. Такім чынам, пацвярджаецца тэзіс, што бульбаводствам займацца выгадна, і гэтая культура можа даваць добрую рэнтабельнасць (у гэтым годзе 100% і больш).Касаючыся ў цэлым рэалізацыі праграмы адраджэння вёскі, Аляксандр Лукашэнка адзначыў, што ў наступнай пяцігодцы неабходна будзе надаць увагу канкрэтным пытанням удасканалення сацыяльнай сферы на вёсцы, дашліфаваўшы па шэрагу напрамкаў ужо зробленае. Прэзідэнт назваў станоўчым вопыт ААТ "Старыца-Агра" ў тым, што гаспадарка ўзяла на сябе пытанне дастаўкі сельскіх дзяцей у дзіцячыя сады і школы. Кіраўнік дзяржавы лічыць, што гэта служыць добрым прыкладам і для іншых рэгіёнаў краіны. "Бацькі будуць спакойныя, калі з дзецьмі будзе ўсё нармальна. Вось гэта нам трэба дашліфаваць у наступнай пяцігодцы і дабудаваць аграгарадкі, дзе гэта яшчэ не зроблена. Каб у вёсцы ў нас чалавек жыў, расціў дзяцей і быў абсалютна спакойны за іх будучыню. Нават калі дзіця ў горад не трапіць, не ўладкуецца ва ўніверсітэт, ён павінен ведаць, што патрэбен на вёсцы", - сказаў Аляксандр Лукашэнка. Прэзідэнт падкрэсліў неабходнасць максімальна выкарыстоўваць кан'юнктуру рынку, што тычыцца рэалізацыі бульбы, якая ў гэтым годзе добра ўрадзіла. А з улікам попыту на бульбу ў гэтым годзе, трэба і ў будучыні развіваць бульбаводства. Гаворка ідзе як аб пашырэнні плошчаў пад пасадку гэтай культуры, так і рэканструкцыі агароднінасховішчаў. Па словах Аляксандра Лукашэнкі, ніякія эканамічныя катаклізмы Беларусі не пагражаюць. "Які дэфолт?!", - сказаў Прэзідэнт, адзначыўшы, што дай бог, каб у будучым годзе сітуацыя ў сельскай гаспадарцы была такой жа, як і ў гэтым. "Трошкі з хлебамі падвяло, а так у нас выдатны год", - адзначыў ён. "Вось і ўвесь дэфолт", - дадаў кіраўнік дзяржавы. Аляксандр Лукашэнка падкрэсліў, што ні аб якім дэфолце ў Беларусі гаворкі не ідзе: у нас "ёсць што паесці, дзяцей накарміць (дзяцей мы ў школах і дзіцячых садках накормім) і адзець". "І тут нас не скавырнеш", - перакананы ён.-0-

БЕЛТА