А. Лукашэнка пазітыўна ацаніў праведзеную працу па аднаўленні палацава-паркавага ансамбля ў Нясвіжы

20 ліпеня, Нясвіж /Кар. БЕЛТА/. Прэзідэнт Беларусі Аляксандр Лукашэнка, наведваючы 20 ліпеня палацава-паркавы ансамбль XVI-XIX стагоддзяў у Нясвіжы, пазітыўна ацаніў праведзеную работу па яго аднаўленні, паведамілі БЕЛТА ў прэс-службе беларускага лідара. Рэстаўрацыя палацава-паркавага ансамбля вялася з 1997 па 2012 год, Нясвіжскага замка - з 2004 года. За гэты час Прэзідэнтам было дадзена 19 даручэнняў, якія тычацца рэстаўрацыі і рэканструкцыі комплексу. Аляксандр Лукашэнка наведваў палацава-паркавы ансамбль у маі 2008 года. Тады ён звярнуў увагу на нізкія тэмпы работ па аднаўленні замка, пасля чаго была праведзена замена генпадраднай будаўнічай арганізацыі. Да цяперашняга часу ўсе работы па аднаўленні і рэстаўрацыі комплексу выкананы. Адноўлены і адрэстаўраваны замак, камяніца, арсенал, паўднёвая і ўсходняя галерэі, прыбудова да замка, уваходны мост, падземныя хады абарончых збудаванняў, роў, ляднік, падземныя збудаванні пад усходнім валам, добраўпарадкавана тэрыторыя знешніх фартыфікацыйных збудаванняў. Цалкам адноўлены інтэр'еры княжацкіх пакояў, замкавыя капліцы, Залаты, Белы бальны, Паляўнічы, Малы сталовы, Гетманскі залы, іншыя памяшканні. Аляксандр Лукашэнка агледзеў гэтыя залы, азнаёміўся з экспазіцыяй адрэстаўраванага Нясвіжскага замка і ў цэлым застаўся задаволены ўбачаным. Аднаўлення чакаюць Замкавы, Японскі, Марысін і Англійскі паркі. Як заўважыў кіраўнік дзяржавы, паркі трэба падтрымліваць у іх натуральным стане. "Яны павінны быць такімі, якімі былі ў тыя часы", - сказаў ён. Спецыялістамі завершаны работы па рэстаўрацыі захаваных інтэр'ераў і іх элементаў. 57% экспазіцый уяўляюць арыгінальныя прадметы XVI - пачатку XIX стагоддзя, астатняе - копіі і сучасныя ўзнаўленні старадаўніх арыгіналаў. Міжнародныя эксперты далі пазітыўную ацэнку адноўленым інтэр'ерам. У сувязі з гэтым Прэзідэнт закрануў праблему з рэстаўрацыйнымі кадрамі. Аляксандр Лукашэнка лічыць, што існуючую сістэму ў рэстаўрацыі неабходна рэарганізаваць і аб'яднаць усіх спецыялістаў у адну арганізацыю. "Гэта апошні замак, дзе я хаджу і ўсё трымаю на кантролі. Сядайце і думайце, якім будзе прадпрыемства па рэстаўрацыі. Трэба ўсіх аб'яднаць у адну арганізацыю. А то мы там марнуем шалёныя грошы, робім у разы даражэй, чым калі б замежнікі рабілі", - сказаў кіраўнік дзяржавы.

Аляксандр Лукашэнка лічыць, што ў Беларусі ёсць добрыя рэстаўратары, якіх нельга страціць. "Гэта рэдкія людзі, і яны павінны атрымліваць добрыя грошы за сваю працу", - адзначыў ён. Прэзідэнт даручыў унесці яму прапановы па стварэнні "моцнай, годнай арганізацыі, якая аб'яднала б усіх рэстаўратараў". "Мы не павінны страціць таленты", - дадаў ён. Аляксандру Лукашэнку было дакладзена аб выкананні дадзеных ім даручэнняў па аднаўленні, рэстаўрацыі і рэканструкцыі палацава-паркавага ансамбля. Як праінфармаваў кіраўніка дзяржавы міністр культуры, палацава-паркавы ансамбль ужо аказвае цэлы шэраг платных паслуг. У 2011 годзе даходы ад іх склалі Br1,5 млрд. За тры апошнія гады вырасла і колькасць наведвальнікаў комплексу. Калі ў 2010 годзе палацава-паркавы ансамбль наведалі 173 тыс. чалавек, у 2011-м - 210 тыс., то за першае паўгоддзе 2012 года - каля 136 тыс. чалавек. Чакаецца, што да канца года тут пабываюць каля 300 тыс. наведвальнікаў. Па словах Паўла Латушкі, на працягу двух-трох гадоў комплекс выйдзе на 100-працэнтную акупнасць затрат на ўтрыманне аб'екта. Для зручнасці турыстаў у замку адкрыта гасцініца на 47 нумароў, якая размясцілася ў памяшканнях камяніцы і былой карэтнай, а таксама кафэ, рэстаран, крама сувеніраў. У памяшканнях і на тэрыторыі Нясвіжскага замка праводзяцца музычныя, тэатральныя і іншыя культурна-масавыя мерапрыемствы. Аляксандр Лукашэнка адзначыў, што наведванне палацава-паркавага ансамбля ў Нясвіжы павінна быць даступным для беларусаў. "Не трэба рвацца і бегчы за вялікімі грашыма. Усё трэба рабіць паступова. Бо мы тады адіб'ем ахвоту ў уласных людзей. Трэба, каб беларусы гэта бачылі", - адзначыў кіраўнік дзяржавы. "Усё трэба рабіць вельмі акуратна, разумна. Дырэктар павінен зыходзіць з таго, як быццам гэта яго комплекс, лішні крок улева або ўправа - страты. А не думаць, што дзяржава дзесьці дапаможа, падставіць плячо", - падкрэсліў Прэзідэнт. Аляксандр Лукашэнка пагутарыў таксама з прадстаўнікамі роду Радзівілаў, якія прыехалі наведаць адрэстаўраваны замак. Яны адзначылі, што ў цэлым ім падабаецца тое, што выканана ў замку. "Радзівілы ніколі не хацелі з'язджаць адсюль, але ў 1939 годзе былі вымушаны зрабіць гэта. Але наша сэрца заўсёды тут", - сказаў адзін з нашчадкаў роду Радзівілаў. "Прыязджайце сюды. Цяпер вам ёсць куды прыехаць", - у сваю чаргу сказаў Прэзідэнт. Кіраўнік дзяржавы перадаў у дар музею пояс слуцкага тыпу, характэрны для паясоў, якія вырабляліся на мануфактурах Рэчы Паспалітай у 1760-1790-х гадах. Ён вытканы з шаўковай і сярэбранай пазалочанай нітак. Аляксандр Лукашэнка таксама пакінуў запіс у кнізе ганаровых гасцей палацава-паркавага ансамбля: "Багатая культурная і гістарычная спадчына Беларусі выклікае пачуццё гонару ў кожнага яе жыхара. Адным з унікальных помнікаў архітэктуры з'яўляецца палацава-паркавы ансамбль у Нясвіжы, уключаны ў Спіс сусветнай спадчыны ЮНЕСКА. Не аднойчы абнаўляўся ён пасля войнаў, пажараў і перыядаў забыцця. Дзякуючы працы рэстаўратараў, будаўнікоў і спецыялістаў музейнай справы сёння мы бачым Нясвіжскі замак ва ўсёй яго прыгажосці. Няхай і надалей гэта цудоўны твор айчыннага дойлідства застаецца ўвасабленнем культурнага багацця Беларусі, сімвалам невычарпальных стваральных сіл і здольнасцей нашага народа". У сваю чаргу Прэзідэнту на памяць аб наведванні палацава-паркавага ансамбля быў перададзены габелен з відамі Нясвіжскага замка.-0-

БЕЛТА