18 ліпеня, Мінск /Таццяна Паляжай - БЕЛТА/. Прэзідэнт Беларусі Аляксандр Лукашэнка запрашае замежных інвестараў да распрацоўкі новых радовішчаў у Беларусі, у тым ліку калійных. Аб гэтым кіраўнік дзяржавы заявіў сёння на сустрэчы з кіраўніцтвам групы кампаній Boulle Mining Group, перадае карэспандэнт БЕЛТА. Аляксандр Лукашэнка адзначыў, што з улікам росту попыту на карысныя выкапні, у тым ліку і калійныя, у Беларусі дастаткова прапаноў інвестараў па распрацоўцы ўжо вядомых і новых радовішчаў. Беларускі бок у цяперашні час выбірае з гэтых прапаноў найбольш выгадныя. Па словах Прэзідэнта, магчымасць цяперашняй сустрэчы прапрацоўвалася з сярэдзіны мінулага года. "Вы - людзі заможныя, багатыя, гатовыя працаваць у Беларусі, - сказаў Аляксандр Лукашэнка, звяртаючыся да кіраўніцтва групы кампаній Boulle Mining Group. - Нам прадказвалі ледзь не крах эканомікі, але калі інвестары ідуць у нашу краіну, значыць, да краху яшчэ далёка". Кіраўнік дзяржавы звярнуў увагу на тое, што для Беларусі вельмі важнае пытанне даследавання прыродных рэсурсаў. "Мне здаецца, мы далёка не ўсё ведаем пра тое, чым валодаем", - сказаў ён. Па словах кіраўніка дзяржавы, геолагаразведка і прамысловае асваенне прыродных багаццяў набываюць асаблівую актуальнасць. У Беларусі маюцца вопыт і адпаведныя структуры для вядзення геолагаразведкі і прамысловай распрацоўкі радовішчаў, дадаў Аляксандр Лукашэнка. Звяртаючыся да кіраўніка групы кампаній Жан-Раймона Буля, Аляксандр Лукашэнка сказаў, што ў Беларусі добра ведаюць аб гэтай кампаніі, азнаёмлены з яе дзейнасцю, вопытам у геолагаразведцы і сучаснымі метадамі здабычы мінеральнай сыравіны. "Мы былі б вельмі зацікаўлены ў супрацоўніцтве ў гэтым напрамку, - падкрэсліў Прэзідэнт. - Мы зацікаўлены ў найноўшых тэхналогіях і маштабных аб'ёмах капіталаўкладанняў". Па словах кіраўніка дзяржавы, выкарыстанне прыродных рэсурсаў мае не толькі чыста эканамічны інтарэс, але і велізарнае сацыяльна-палітычнае значэнне. У першую чаргу гэта тычыцца галоўнага рэзерву - калійных соляў, па запасах якіх Беларусь займае трэцяе месца ў свеце. Аляксандр Лукашэнка нагадаў, што з трох адкрытых буйных радовішчаў здабыча вядзецца пакуль толькі на адным - Старобінскім, два іншыя - Акцябрскае і Петрыкаўскае - пакуль яшчэ недастаткова распрацаваны. Аляксандр Лукашэнка пацвердзіў зацікаўленасць у распрацоўцы гэтых радовішчаў.