27 жніўня, Мінск /Уладзімір Мацвееў - БЕЛТА/. Прэзідэнт Беларусі Аляксандр Лукашэнка раскрытыкаваў работу ўрада і Нацыянальнага банка Беларусі па выкананні найважнейшых параметраў сацыяльна-эканамічнага развіцця краіны. Пра гэта сёння ён заявіў падчас даклада ўрада і Нацбанка аб рабоце эканомікі і сацыяльна-эканамічным развіцці, перадае карэспандэнт БЕЛТА. У уступным слове кіраўнік дзяржавы адзначыў, што пытанні, вынесеныя на абмеркаванне, маюць вялікую важнасць для развіцця краіны. "Нам трэба разгледзець не толькі справаздачу ўрада і Нацыянальнага банка аб выніках работы за мінулы перыяд 2010 года, але і праекты дакументаў, якія стануць найважнейшымі інструментамі дзяржаўнай палітыкі, што вызначаюць развіццё краіны ў будучым годзе і на сярэднетэрміновую перспектыву", - сказаў Прэзідэнт, адзначыўшы, што неабходна выявіць найбольш вострыя праблемы. "Ад таго, з якімі вынікамі мы падыдзем да канца пяцігодкі, будзе залежаць, як мы будзем трымаць справаздачу перад беларускім народам за рэалізацыю рашэнняў трэцяга Усебеларускага народнага сходу, за выніковасць прынятых намі мер па паляпшэнню якасці жыцця насельніцтва. За ўсё, што было намі абяцана", - падкрэсліў Аляксандр Лукашэнка. Па словах Прэзідэнта, нягледзячы на паступовае нарошчванне тэмпаў, не вырашаны шэраг праблем, якія істотна стрымліваюць дынамічнае сацыяльна-эканамічнае развіццё краіны. "У студзені-ліпені 2010 года практычна правалена выкананне найважнейшых параметраў па асноўных мэтавых паказчыках прагнозу. Не дасягнута запланаванае ні па прамысловай вытворчасці, ні па выпуску сельскагаспадарчай прадукцыі, ні па інвестыцыях у асноўны капітал, ні па іншых найважнейшых паказчыках", - адзначыў ён. У выніку ўсё гэта істотна паўплывала на тэпы росту валавога ўнутранага прадукту (107% пры прагнозе 111-113%). Аляксандр Лукашэнка таксама назваў вельмі нездавальняючай работу дзяржда органаў па прыцягненні ў эканоміку краіны прамых замежных інвестыцый. Ён адзначыў несбалансаванасць у знешнім гандлі і нізкую дыверсіфікацыю экспарту. За 6 месяцаў бягучага года адмоўнае сальда знешняга гандлю таварамі і паслугамі сфармавалася ў суме $2,4 млрд. Акрамя таго, кіраўнік дзяржавы ў чарговы раз звярнуў увагу на праблему ліквідацыі запасаў гатовай прадукцыі на складах. "Вырашэнне гэтай праблемы важна не само па сабе. Ад гэтага залежыць фінансавае становішча рэальнага сектара эканомікі", - падкрэсліў Прэзідэнт.