8 чэрвеня, Мінск /Таццяна Паляжай - БЕЛТА/. Прэзідэнт Беларусі Аляксандр Лукашэнка сёння на нарадзе па актуальных пытаннях эканомікі распарадзіўся напалову ўрэзаць расход паліва службовага транспарту ўрада і Адміністрацыі Прэзідэнта, перадае карэспандэнт БЕЛТА. "З заўтрашняй раніцы напалову ўрэзаць ліміт паліва ўраду і Адміністрацыі. На роварах хай ездзяць, тады, можа быць, будуць думаць, як думаюць людзі", - сказаў кіраўнік дзяржавы. "Як на зло робяць!" - дадаў Прэзідэнт. "Людзі толькі-толькі ачунялі ад удару - на табе, як абухом па галаве, другі раз. Толькі людзі прыйшлі ў сябе - на табе трэці раз, і гэта, мне дакладваюць, не апошні", - канстатаваў Прэзідэнт. "Тады, хлопцы, я скажу вам, не ў краіне, а дзесьці за межамі трэба будзе шукаць працу, - сказаў Аляксандр Лукашэнка, звяртаючыся да прысутных у зале. - Я дапусціць гэтага здзеку над людзьмі не магу. Я вас папярэдзіў 10 дзён таму, прэм'ер-міністра асабіста". "Вы зыходзіце з нейкага курса долара. Скажыце мне, калі ласка, а які сёння рэальны курс долара? Не ведаеце. Дык чаму прывязвайце да нейкага незразумелага курса долара ўсё на свеце, у тым ліку і паліва? Няўжо тут нельга было прайсці спакойна, павысіўшы цэны на паліва на 10-15% адразу, а потым расцягнуць да 1 студзеня, калі стабілізуецца сітуацыя на валютным рынку, прывязацца да нейкага долара і пералічыць праз долар цану на гэта паліва. Гэта нельга было зрабіць?" - сказаў кіраўнік дзяржавы. Прэзідэнт падкрэсліў, што на сённяшняй нарадзе мае намер пачуць выразныя тлумачэнні з пункту гледжання ўнутранай сітуацыі ў краіне. "Шчырае слова, як дзеці малыя. Ад вас запалкі ў доме трэба хаваць, бо дом спаліце. Толькі адвернешся - дакладна дом спаліце", - сказаў Прэзідэнт. Звяртаючыся да губернатараў, кіраўнік дзяржавы адзначыў, што мае намер пачуць ад іх, як яны збіраюцца весці ўборачную кампанію, павысіўшы цэны на паліва. "Ці вы думаеце, што з бюджэту вам хтосьці грошы дасць? У бюджэце гэтых грошай няма", - падкрэсліў Прэзідэнт.