5 чэрвеня, Мінск /Уладзімір Мацвееў - БЕЛТА/. Кіраўнік беларускай дзяржавы Аляксандр Лукашэнка разлічвае на садзейнічанне Савета Федэрацыі Федэральнага сходу Расіі ў развіцці адносін Беларусі з расійскімі рэгіёнамі. Аб гэтым ён заявіў сёння на сустрэчы са старшынёй Савета Федэрацыі Валянцінай Мацвіенка, перадае карэспандэнт БЕЛТА. "Былі часы, вы іх памятаеце, калі становішча нашага Саюза (Беларусі і Расіі. - Заўвага. БЕЛТА) было вельмі хісткім. І тады супрацоўніцтва з рэгіёнамі выратавала нашы адносіны", - сказаў кіраўнік дзяржавы. У сувязі з гэтым Аляксандр Лукашэнка адзначыў, што Савет Федэрацыі па сваёй сутнасці з'яўляецца палатай тэрытарыяльнага прадстаўніцтва, якая аб'ядноўвае расійскія рэгіёны ў гэтым органе ўлады. "Нам бы вельмі хацелася, каб вы падключыліся да гэтага працэсу супрацоўніцтва Беларусі з рэгіёнамі. Вы б дапамаглі захаваць аснову нашых адносін. Мы на любым узроўні гатовы з вамі супрацоўнічаць, у тым ліку на маім, таму што ідэя супрацоўніцтва паміж расійскімі рэгіёнамі і Беларуссю ў свой час мною была вылучана, я буду ўсяляк з вамі супрацоўнічаць, калі вы пагодзіцеся на гэту ініцыятыву", - запэўніў Прэзідэнт. Кіраўнік дзяржавы таксама адзначыў, што закранаў гэту тэму ў гутарцы з кіраўніцтвам Расіі. "Фактычна ёсць адабрэнне. І калі б вы гэта ўзялі пад свой кантроль, як чалавек ужо які ведае гэту тэму, вы б вельмі моцна дапамаглі ў збліжэнні нашых дзяржаў", - падкрэсліў беларускі лідар. Аляксандр Лукашэнка таксама станоўча ацаніў падпісанне пагаднення аб супрацоўніцтве паміж Саветам Рэспублікі Нацыянальнага сходу Беларусі і Саветам Федэрацыі Федэральнага сходу Расіі: "Я абсалютна падтрымліваю гэта пагадненне. Яно нам вельмі патрэбна". "Павінен сказаць, што члены Савета Федэрацыі заўсёды нас падтрымлівалі на любым узроўні. Мы вам за гэта вельмі ўдзячныя, за падтрымку на міжнароднай арэне, калі вы, нават ідучы наперадзе Беларусі, спрабавалі абараніць нас ад гэтых нападак. Вы ведаеце крыніцы і аснову ўсіх гэтых адносін Захаду да нас", - дадаў кіраўнік дзяржавы. Аляксандр Лукашэнка таксама асабліва адзначыў вялікую ролю Валянціны Мацвіенка ў развіцці беларуска-расійскіх адносін, у тым ліку на пасадзе губернатара Санкт-Пецярбурга.