А. Лукашэнка ставіць задачу стварэння сістэмы эфектыўнага выкарыстання аб'ектаў малой энергетыкі на мясцовых відах паліва

Прэзідэнту былі прадэманстраваны мадыфікацыі катлоў, якія працуюць на мясцовых відах паліва, а таксама новы кацёл, які дазваляе выпрацоўваць цеплавую і электрычную энергію з драўняных адходаў і фрэзернага торфу. Яго магутнасць складае 3МВт, што дазваляе атрымліваць 2,5 МВт цеплавой энергіі і 250 кВт - электрычнай. Ужо зараз многія прадпрыемствы "Белэнерга" выяўляюць цікавасць да гэтай навінкі. "Узор новага катла ёсць, а сістэмы пераходу на мясцовыя віды паліва няма, - сказаў Аляксандр Лукашэнка. - Трэба стварыць такую сістэму, навучыць людзей працаваць. А то атрымліваецца: кацёл добры, усё падвялі, правялі, а на падыходзе да яго - каменны век". У сувязі з гэтым кіраўнік дзяржавы даручыў стварыць у краіне сістэму пераходу прадпрыемстваў на мясцовыя віды паліва. Аляксандр Лукашэнка даручыў ажыццяўляць неабходныя работы, не забываючы і аб добраўпарадкаванні прылеглай тэрыторыі, у тым ліку тэрыторыі для захоўвання самага паліва. Такім чынам павінна быць створана новая культура працы на мадэрнізуемых прадпрыемствах. Аляксандр Лукашэнка азнаёміўся з асаблівасцямі дзейнасці НПП "Белкатламаш", наведаў вытворчыя цэхі. "Мы распрацоўваем катлы, якія працуюць на мясцовых відах паліва, - расказаў дырэктар "Белкатламаша" Віктар Краўчанка. - Прычым іх эфектыўнасць значна вышэй, чым у газавых. Так, сабекошт выпрацоўкі 1 Гкал у катле на фрэзерным торфе складае Br158 тыс., на газе - Br240 тыс." У апошні час прадпрыемства пашырае сваю вытворчасць. Калі ў 2010 годзе тут было выраблена 86 катлоў, то ў бягучым годзе іх колькасць узрасце да 110 штук. У 2015 годзе гэты паказчык плануецца давесці да 200 штук. Акрамя спажывання на ўнутраным рынку прадукцыя НПП "Белкатламаш" актыўна экспартуецца. Цікавасць да яе выяўляюць гаспадаркі Казахстана, Украіны, Расіі. У цяперашні час ужо функцыянуе прадстаўніцтва прадпрыемства ў Санкт-Пецярбургу, у перспектыве "Белкатламаш" плануе адкрыць сваё прадстаўніцтва ў Маскве. "Калі раней мы працавалі толькі на ўнутраны рынак, то праблемы на валютным рынку прымусілі нас больш актыўна прадаваць прадукцыю на экспарт, зарабляючы такім чынам валюту для набыцця імпартнай сыравіны", - адзначыў Віктар Краўчанка і растлумачыў, што прадпрыемства купляе метал у расійскіх пастаўшчыкоў. Аляксандр Лукашэнка параіў кіраўніку НПП "Белкатламаш" пры продажы катлоў прапаноўваць пакупнікам свае паслугі па іх мантажы і далейшым абслугоўванні. Што тычыцца развіцця энергетыкі ў Віцебскай вобласці ў цэлым, то пра гэта Прэзідэнту расказаў старшыня Віцебскага аблвыканкама Аляксандр Косінец. У прыватнасці, ён паведаміў, што вобласць да 2013 года плануе павялічыць долю мясцовых відаў паліва ў балансе прадпрыемстваў ЖКГ з цяперашніх 59,8% да 75%. “Першапачаткова мы планавалі выйсці на гэты паказчык да 2015 года, але цяпер ставім амбіцыйную задачу - выйсці на долю мясцовых відаў паліва ў балансе прадпрыемстваў ЖКГ да 75% да 2013 года”, - сказаў Аляксандр Косінец. Ён таксама праінфармаваў Прэзідэнта, што ўжо сёння Віцебская вобласць па гэтым паказчыку апярэджвае іншыя рэгіёны і рэспубліку ў цэлым. Так, доля мясцовых відаў паліва ў балансе прадпрыемстваў ЖКГ Беларусі складае 40,8%, у той час як у Віцебскай вобласці - 59,8%. Да 2015 года гэты паказчык па рэспубліцы запланаваны на ўзроўні 54,5%. “У нас не атрымлівалася зрабіць гэта раней, бо не было патрэбных катлоў, - растлумачыў губернатар Віцебшчыны. - Цяпер жа мы гатовы цалкам змяніць структуру паліўнага балансу”. Аляксандр Косінец паведаміў, што цяпер распрацоўваецца праект праграмы па развіцці малой энергетыкі Віцебскай вобласці. У перспектыве ў рэгіёне плануецца ўзвесці 68 аб'ектаў такой энергетыкі. Па словах Аляксандра Косінца, рэалізацыя намечаных планаў па развіцці энергетыкі на мясцовых відах паліва дазволіць да 2015 года скараціць спажыванне прыроднага газу ў 2 разы. Наступнай тэматыкай цяперашняга працоўнага дня Прэзідэнта стала развіццё мясной птушкагадоўлі. Згодна з Праграмай развіцця птушкагадоўлі ў краіне да 2015 года плануецца падвоіць вытворчасць мяса птушкі, прычым не толькі традыцыйных відаў - курынага, качынага, гусінага, але і страўсінага і індычаціны. Так, аб'ём вытворчасці птушкі павінен скласці 568,7 тыс.т, яек - 2743,4 млн.штук. Плануецца, што рэнтабельнасць вытворчасці мяса птушкі за гэтую пяцігодку складзе 26,6%, а ў 2015 годзе дасягне 40%. У 2006-2010 гадах гэты паказчык роўны 16,5%. Такім чынам, рост аб'ёмаў вытворчасці птушкі за 5 гадоў складзе 77%. Прэзідэнт наведаў беларуска-расійскае сумесную таварыства з абмежаванай адказнасцю "Витконпродукт", дзе азнаёміўся з тэхналагічным працэсам вываду сутачных цыплят-бройлераў і вырошчваннем мяса птушкі па інтэнсіўных рэсурсазберагальных тэхналогіях.Прадпрыемства, створанае ў 1998 годзе, спецыялізуецца на вырошчванні цыплят-бройлераў. Цэхі па вырошчванні цыплят аснашчаны сучаснымі лініямі паення, кармлення і клімат-кантролю і дазваляюць вырошчваць да 8,5 млн. цыплят у год. Цыпляты-бройлеры вырошчваюцца на энергетычна збалансаваных івітамінізаваных кармах, без дадання гармональных прэпаратаў і антыбіётыкаў. У мэтах скарачэння імпарту сутачных цыплят-бройлераў на прадпрыемстве функцыянуе інкубатар, аснашчаны найноўшым экалагічным абсталяваннем галандскай фірмы з вытворчай магутнасцю 14,5 млн. сутачных цыплят у год. Гэта дазволіла цалкам забяспечыць патрэбу СААТ "Вітконпрадукт" у пасадковым пагалоўі. Так, за 2010 год інкубавана 8,4 млн. галоў сутачных цыплят-бройлераў, за студзень-красавік гэтага года - 2,8 млн. галоў. Гэты інкубатар з'яўляецца адзіным такога роду ў Беларусі. Прадпрыемства пачало будаўніцтва цэха па вырошчванні бацькоўскага статка для забеспячэння сваіх магутнасцей інкубацыйным яйцом. Прадпрыемства плануе вырабіць у гэтым годзе 16,7 тыс. т мяса птушкі. За першы квартал выраблена 5,4 тыс. т мяса. Плануецца, што аб'ём вытворчасці прадукцыі з мяса птушкі ў гэтым годзе складзе Br97,3 млрд. Значная частка прадукцыі прадпрыемства пастаўляецца на экспарт. Аляксандр Лукашэнка адзначыў, што пастаўкі на свой рынак павінны быць прыярытэтнымі. У прадукцыі прадпрыемства цыпляты-бройлеры займаюць 45%, субпрадукты - 9%, прадукты глыбокай перапрацоўкі - 14%, паўфабрыкаты - 32%. Акрамя таго, СААТ "Вітконпрадукт" займаецца вырошчваннем свіней, мае камбікормавы завод. У найбліжэйшых планах у кіраўніка прадпрыемства - стварэнне аграхолдынг. Да 2015 года плануецца штогод вырабляць мяса птушкі і свініны ў аб'ёме 45 тыс. т. Як было дакладзена кіраўніку дзяржавы, аб'ём інвестыцый у развіццё прадпрыемства за 5 гадоў склаў Br38 млрд., прыбытак - Br36 млрд.На СТАА "Вітконпрадукт" працуе ўчастак па выпуску копчана-вараных і каўбасных вырабаў з прадукцыйнасцю 150 т у месяц, які дазваляе выпускаць больш за 30 найменняў вырабаў з мяса. Вытворчыя магутнасці выкарыстоўваюцца на 100%, аб'ём рэалізацыі мясной прадукцыі за 2010 год склаў амаль Br96 млрд. СТАА "Вітконпрадукт" стала пераможцам у абласным конкурсе на лепшага прадпрымальніка 2010 года ў сферы вытворчасці харчовых прадуктаў. З 2011 года прадукцыя прадпрыемства, а менавіта мяса цыплят-бройлераў і натуральныя астуджаныя паўфабрыкаты з мяса птушкі, атрымала права маркіравацца знакам "Натуральны прадукт. Беларусь". Аляксандр Лукашэнка застаўся задаволены ўбачаным і адзначыў, што прадстаўленую структуру вытворчасці можна ўзяць за ўзор для рэспублікі. Прэзідэнт станоўча ацаніў працу кіраўніка. "Ніхто не будзе казаць, што ў нас няма прыватнікаў у сельскай гаспадарцы", - дадаў кіраўнік дзяржавы. Закрануўшы тэму працы прыватнага бізнесу ў Беларусі, Прэзідэнт адзначыў, што бачыць вялікія перспектывы яго развіцця ў краіне. "Толькі хворыя людзі могуць казаць, што Прэзідэнту прыватнік не патрэбны", - заўважыў Аляксандр Лукашэнка. Звяртаючыся да кіраўніка прадпрыемства Уладзіміра Някрашэвіча, Прэзідэнт сказаў: "Што падштурхоўвае цябе? Гэта тваё жыццё, твой хлеб. Мая справа толькі забяспечыць правы чалавека, кіраўніка холдынгу і ўсіх людзей. Я мару аб тым, каб займацца толькі правамі чалавека, каб забяспечыць нармальны заробак і каб ніхто не мог прыйсці і сказаць: ты ведаеш, мне гэта падабаецца - аддай, як гэта бывае ў нашых суседзяў". Аляксандр Лукашэнка дадаў, што "ў нас гэтага нібыта няма". "Так, мы ім не падабаемся, таму што яны адчуваюць, што мы канкурэнты, і будуць душыць па ўсіх напрамках. Будуць душыць на "Еўрабачанні", як учора гэтую дзяўчыну. Ну малайчына! Супала ўсё: і паводзіны, і твар, і песня. Яна праспявала гімн Беларусі. Хто ж прапусціць гімн Беларусі? Таму ціснуць там, будуць ціснуць і тут", - сказаў кіраўнік дзяржавы. Пры гэтым ён лічыць, што галоўны вынік у тым, што сёння "ў чарзе стаяць на беларускую прадукцыю". Характарызуючы папярэдні дзень рабочай паездкі ў Магілёўскую вобласць, Прэзідэнт зноў акцэнтаваў увагу на чатырох напрамках рэфармавання сельскай гаспадаркі.Акрамя таго, Прэзідэнт арыентуе на адкрыццё вытворчасцей, якія прыносяць хуткі прыбытак. Аляксандр Лукашэнка ўзгадаў наведанае напярэдадні фруктасховішча ў ААТ "Александрыйскае" і іх вопыт па вырошчванні грыбоў вешанак. Тады ж кіраўнік дзяржавы прыняў рашэнне аб будаўніцтве завода па вытворчасці грыбоў. Гэта эфектыўная вытворчасць са стопрацэнтнай рэнтабельнасцю, пры гэтым не патрабуе практычна ніякіх укладанняў. "Попыт на гэту прадукцыю шалёны. А гэта хуткія грошы. Працуе тры чалавекі, а якая аддача ад вытворчасці, - сказаў Прэзідэнт. - Калі ёсць попыт, значыць, трэба рабіць. Трэба шукаць, дзе можна зарабіць хуткія грошы". Кіраўнік дзяржавы зноў загаварыў пра Шклоўскі раён як пра своеасаблівы ўзор вядзення гаспадаркі для іншых рэгіёнаў краіны. "Я думаю, ёсць сэнс прыгледзецца да Шклоўскага раёна. Мы недзе навобмацак, недзе планава, але выйшлі на тое, што трэба. Гэта адзін з варыянтаў таго, як трэба рабіць. У гэтым годзе практычна ўсе гаспадаркі Шклоўскага раёна будуць працаваць рэнтабельна і без датацый", - падкрэсліў Прэзідэнт. Ён таксама дадаў, што ёсць раёны, куды дзяржава ўклалася, але пакуль не адчувае патрэбнай аддачы. Шклоўскі ж раён працуе добра ў гэтым годзе, таму кіраўнік дзяржавы лічыць, што такую структуру вядзення гаспадаркі могуць прымяняць у сябе і іншыя рэгіёны краіны. Што тычыцца Віцебскай вобласці, то Аляксандр Лукашэнка пахваліў губернатара Аляксандра Касінца за значныя зрухі ў вядзенні сельскай гаспадаркі. "Зрухі надзвычайныя ў Віцебскай вобласці па культуры земляробства. Але яшчэ ёсць над чым працаваць", - адзначыў кіраўнік дзяржавы. - Калі вы ўсюды так працуеце, як там, дзе я праляцеў, то гэта вялікі зрух. Але гэта толькі палова. За гэты год трэба зрабіць усё астатняе". "Культура земляробства павінна быць нармальнай. На ворнай зямлі не павінна нічога будавацца", - дадаў ён. У той жа час Аляксандр Лукашэнка жорстка папярэдзіў аб недапушчальнасці выпадкаў гаспадарчай неабачлівасці. "Як толькі выявім гаспадарчую неабачлівасць, адразу ўрэжам усе дзяржпраграмы на гэту суму", - падкрэсліў Прэзідэнт. Кіраўнік дзяржавы пацікавіўся таксама, як вядзецца меліярацыя земляў у вобласці. Аляксандр Касінец далажыў, што ў рэгіёне на меліярацыі земляў працуе 25 атрадаў, задзейнічана больш за 220 адзінак тэхнікі. У той жа час ёсць патрэба ў кваліфікаваных спецыялістах і тэхніцы.-0-

БЕЛТА