17 снежня, Мінск /Кар. БЕЛТА/. Холдынг "Амкадор" плануе паставіць арганізацыям жыллёва-камунальнай гаспадаркі Віцебскай вобласці больш за 40 адзінак тэхнікі для ўтрымання гарадскіх тэрыторый. Пра гэта паведамілі БЕЛТА ў прэс-службе ААТ "Амкадор" - кіруючая кампанія холдынгу". "У восеньска-зімовы перыяд жыллёва-камунальныя гаспадаркі адчуваюць вострую патрэбу ў дарожна-будаўнічай тэхніцы. Асабліва сёння, калі снежныя заносы сталі сапраўднай праблемай для аўтамабілістаў, камунальнікі адчуваюць недахоп спецыяльных машын", - адзначылі ў прэс-службе. Так, у сувязі з узніклай патрэбай ААТ плануе паставіць арганізацыям жыллёва-камунальнай гаспадаркі Віцебскай вобласці больш за 40 адзінак тэхнікі. Гэта пагрузчыкі з бартавым паваротам "Амкадор-211", пагрузчыкі універсальныя "Амкадор-320", "Амкадор-332С4, "Амкадор-342С4, пагрузчыкі "Амкадор-134-01", а таксама экскаватары-пагрузчыкі "Амкадор-702" і машыны пагрузачныя універсальныя "Амкадор-37". Акрамя таго, плануюцца пастаўкі каля 100 адзінак навеснага абсталявання. Холдынг "Амкадор" і раней ажыццяўляў адгрузкі тэхнікі ў Віцебскую вобласць. Асаблівую папулярнасць у гэтым рэгіёне набылі пагрузчыкі універсальныя мадэлі "320" і "352С-02", якія па сваіх параметрах не саступаюць вядучым замежным аналагам. "Амкадор" - адзін з найбуйнейшых вытворцаў дарожна-будаўнічай, камунальнай, снегаўборачнай, лясной, сельскагаспадарчай і іншай спецыяльнай тэхнікі ў СНД і Еўропе. Штогод аб'яднанне прадпрыемстваў выпускае больш за 5 тыс. адзінак спецыяльных машын, звыш 80 мадэляў і мадыфікацый, якія эксплуатуюцца больш чым у 30 краінах. Гэта універсальныя і франтальныя аднакаўшовыя пагрузчыкі, з бартавым паваротам і тэлескапічнай стрэлай, відэльчатыя аўтапагрузчыкі і аэрадромныя ўборачныя машыны, снегаачышчальнікі і траншэекапальнікі, бульдазеры-пагрузчыкі і экскаватары-пагрузчыкі, фрэзерныя і бурыльна-кранавыя машыны, харвестэры і форвардэры, збожжаачышчальна-сушыльныя комплексы і іншыя.-0-

БЕЛТА