Падчас прамой тэлефоннай лініі і асабістага прыёму грамадзян памочнік Прэзідэнта – інспектар па Віцебскай вобласці Анатоль Ліневіч разгледзеў звароты па пытаннях ЖКГ, землеўпарадкавання, лесааднаўлення і іншыя, перадае карэспандэнт БЕЛТА.
Да памочніка Прэзідэнта паступіла сем зваротаў з Полацкага раёна. Грамадзян цікавілі праблемы добраўпарадкавання, рамонту, водазабеспячэння, развіцця прадпрыемства, высечкі лясоў. Стараста Дрэтуні Полацкага раёна ад імя ўсіх жыхароў населенага пункта папрасіла ўрэгуляваць расклад цягніка, на якім мясцовае насельніцтва дабіраецца да райцэнтра. Цягнік ходзіць усяго два разы на тыдзень, білет на яго ў тры разы таннейшы, чым на аўтобус, што для пенсіянераў і дачнікаў значна выгадней. Да таго ж на чыгуначным транспарце зручней давозіць аб'ёмныя пакупкі. Пенсіянерка адзначыла, што дрэтунцам хацелася б, каб цягнік у тыя ж дні па раскладзе хадзіў хаця б два разы на дзень туды і назад, а не стаяў на канечнай станцыі па шэсць гадзін. Анатоль Ліневіч даў даручэнне ў найкароткія тэрміны перагледзець расклад, знайсці рэзервы і, калі нявыгадна пускаць напаўпусты цягнік, скараціць колькасць вагонаў, але не пакідаць жыхароў Дрэтуні без транспартнага паведамлення з Полацкам.
Наваполачанку, якая дазвонілася на прамую лінію, турбавала, што мясцовыя лясы рэдкія з-за высечак, а новых пасадак яна не назірае. Анатоль Ліневіч расказаў заяўніцы, што гэта планавая рубка, і пакінутыя адзінкавыя дрэвы, на якія звярнула ўвагу жанчына, прызначаны для натуральнага апылення. Да таго ж лясгасы рэгулярна займаюцца пасадкамі. Памочнік Прэзідэнта параіў кіраўніцтву раёна правесці тлумачальную працу праз СМІ сумесна з мясцовым лясгасам, каб грамадзяне разумелі сітуацыю з санітарнымі і планавымі высечкамі і мелі ўяўленне, дзе і з якой мэтай прарэджваюць лясы і папаўняюць лясны фонд раёна.
Палачанка звярнулася з пытаннем землеўпарадкавання і рэгістрацыі ўчастка. З-за тэхнічнай памылкі адпаведнай службы, якую кіраўнік арганізацыі прызнаў, недахоп быў устранены, але заяўніца адмаўляецца прыняць рашэнне райвыканкама і звярнулася за абскарджаннем з-за блізкай мяжы ўчастка да дома, дзе праходзіць газавая труба, і спрэчкі за тэрыторыю з суседкай. Анатоль Ліневіч параіў звярнуцца ў суд, каб канчаткова паставіць кропку ў спрэчцы. Інспектар па Віцебскай вобласці таксама даў даручэнне спецыялістам райвыканкама выехаць на месца разам з работнікамі газавай службы, каб праясніць сітуацыю і знайсці магчымыя шляхі вырашэння.
У кватэры пажылой палачанкі дрэнна функцыянуе выцяжная вентыляцыя. Спецыялісты ЖКГ раней правялі абследаванне, зрабілі індывідуальную вентыляцыю. Прадстаўнік абслугоўваючай арганізацыі запэўніў, што яны яшчэ раз правераць клапаны і заменяць, калі яны няспраўныя.
Дзве жыхаркі Полацка, якія пражываюць у доме, якому ўжо больш за 70 гадоў, расказалі пра праблемы ў пад'ездзе. З жніўня дом будзе пастаўлены на капрамонт, як адзначылі ў раённым ЖКГ, і цеплапункт, які знаходзіцца ў пад'ездзе, будзе вынесены. Анатоль Ліневіч даручыў да 10 красавіка правесці бягучы рамонт, а капрамонт і яго вынікі ён узяў на асабісты кантроль.
Жыхар гарпасёлка Ветрына прыйшоў на асабісты прыём да памочніка Прэзідэнта з прапановамі па развіцці эксперыментальнай базы і добраўпарадкаванні ў населеным пункце. Комплексныя пытанні заяўніка Анатоль Ліневіч выслухаў і даручыў праблемы вырашыць сумесна з ЖКГ, мясцовай уладай.
Памочнік Прэзідэнта адзначыў, што абстаноўка па зваротах грамадзян у Полацкім раёне значна палепшылася ў параўнанні з першымі прыёмамі. Непрымальных пытанняў жыхары горада і раёна не ўздымаюць, амаль усе глабальныя праблемы мясцовая ўлада вырашае аператыўна. "Прыемна, што жыхары вобласці і ў прыватнасці Полацкага раёна заўважаюць, што робіцца для паляпшэння ў рэгіёне, дзякуюць за станоўчыя змены. Таксама прыемна, што грамадзяне не застаюцца абыякавымі да таго, што адбываецца на Полаччыне, не толькі канцэнтруюцца на сваіх праблемах, а перажываюць за будучыню", - падкрэсліў Анатоль Ліневіч.
Крыніца: vitebsk-region.gov.by
