Беларусі і Кубе неабходна падцягнуць гандлёва-эканамічныя сувязі да найвышэйшага ўзроўню палітычных кантактаў, і краіны зробяць гэта. Пра гэта Прэзідэнт Беларусі Аляксандр Лукашэнка заявіў журналістам па выніках перамоў з Прэзідэнтам Кубы Мігелем Дыяс-Канелем Бермудэсам, перадае карэспандэнт БЕЛТА.
"Каб максімальна рэалізаваць патэнцыял двухбаковага супрацоўніцтва, нам неабходна падцягнуць нашы гандлёва-эканамічныя сувязі да найвышэйшага ўзроўню палітычных кантактаў. І мы гэта зробім, - сказаў беларускі лідар. - Простую, зразумелую формулу толькі што прапанаваў Прэзідэнт Кубы. Ён кажа пра тое, што хопіць імпартаваць тое, што мы можам вырабіць, і ў тым ліку вырабіць разам. Давайце, кажа, будзем ствараць сумесныя прадпрыемствы ў Беларусі і на Кубе. Прымальна! Трэба ў бліжэйшы час ажыццявіць гэту нармальную мадэль".
Беларусь прапануе Кубе не толькі экспарт тавараў і паслуг, але і актыўны ўдзел у рабоце па развіцці ўсіх узаемавыгадных сфер і напрамкаў на аснове комплекснага і стратэгічнага партнёрства.
"Мы гатовы ўкараняць у кубінскую эканоміку сучасныя навуковыя дасягненні і тэхналогіі для паспяховага рэалізацыі сумесных праектаў, разлічаных на доўгатэрміновы эканамічны і перш за ўсё (гэта важна для Кубы і для нас) сацыяльны эфект. Ужо сёння мы рэалізуем на Кубе падобныя праекты ў сферах прамысловасці, фармацэўтыкі, сельскай гаспадаркі і харчавання. Створана зборачная вытворчасць трактароў, навеснага, прычапнога абсталявання да іх", - прывёў некалькі прыкладаў Аляксандр Лукашэнка.