Беларусь і Нарвегія распрацоўваюць дакументы па спрашчэнні візавага рэжыму і супрацоўніцтве ў сферы ядзернай бяспекі
Беларусь і Нарвегія распрацоўваюць дакументы па спрашчэнні візавага рэжыму і супрацоўніцтве ў сферы ядзернай бяспекі. Гэтыя пытанні абмяркоўваліся напярэдадні ў Осла на чарговым раўндзе кансультацый паміж міністэрствамі замежных спраў дзвюх краін, паведамілі БЕЛТА ў прэс-службе МЗС Беларусі.
Беларускую дэлегацыю на перамовах узначаліў намеснік міністра замежных спраў Алег Краўчанка, нарвежскую - дзяржаўны сакратар Міністэрства замежных спраў Аўдун Халворсен.
"З улікам нядаўняга падпісання пагадненняў паміж Беларуссю і Еўрасаюзам аб спрашчэнні выдачы віз і аб рэадмісіі дасягнута дамоўленасць аб падрыхтоўцы ў максімальна сціснутыя тэрміны аналагічных дакументаў паміж Беларуссю і Нарвегіяй. Бакі таксама прывіталі мэтанакіраваныя намаганні профільных ведамстваў дзвюх краін па ўзгадненні праекта пагаднення аб узаемадзеянні паміж нацыянальнымі органамі па ядзернай бяспецы", - адзначылі ў прэс-службе знешнепалітычнага ведамства.
Падчас кансультацый абмяркоўвалася развіццё палітычнага дыялогу, гандлёва-эканамічнага і інвестыцыйнага супрацоўніцтва, фарміраванне дагаворна-прававой базы, узаемадзеянне ў міжнародных арганізацыях. На перамовах разгледжаны пытанні рэгіянальнага парадку дня і міжнароднай бяспекі, развіцця адносін з Еўрапейскім саюзам, Саветам Еўропы, трэцімі краінамі.
Дыпламаты адзначылі значную актывізацыю беларуска-нарвежскага ўзаемадзеяння ў апошнія гады, у тым ліку ў гандлі, канстатавалі ўзаемавыгадны і збалансаваны характар тавараабароту, падкрэслілі намер сумеснымі намаганнямі вырашаць праблемы, што ўзнікаюць, а таксама выкарыстоўваць магчымасці, што адкрываюцца, для пашырэння супрацоўніцтва.
Напярэдадні кансультацый Алег Краўчанка выступіў на беларуска-нарвежскім бізнес-сняданку. Асноўнай тэмай мерапрыемства стаў экспарт беларускіх ІТ-паслуг у Нарвегію. У сустрэчы прынялі ўдзел каля 50 прадстаўнікоў дзелавых колаў Нарвегіі, уключаючы кіраўніцтва Нарвежскага інвестыцыйнага фонду для Паўночнага Захаду Расіі і Усходняй Еўропы. Падпісаны пратаколы аб супрацоўніцтве паміж Беларускай нацыянальнай біятэхналагічнай карпарацыяй і нарвежскай кампаніяй Nordic Molecule Group AS у галіне вытворчасці і рэалізацыі кармоў для рыб і іншай біятэхналагічнай прадукцыі.