17 ліпеня, Мінск /Вольга Беляўская - БЕЛТА/. Беларусь і Турцыя ўзгаднілі квоты дазволаў на міжнародныя аўтамабільныя перавозкі грузаў, паведамілі карэспандэнту БЕЛТА ў прэс-службе Міністэрства транспарту і камунікацый. Умовы супрацоўніцтва ў гэтай сферы абмяркоўваліся на пасяджэнні беларуска-турэцкай змешанай камісіі па міжнародных аўтамабільных зносінах, якое прайшло 11-12 ліпеня ў Анкары. "Бакі адзначылі тэндэнцыю павелічэння аб'ёмаў перавозак грузаў аўтамабільным транспартам паміж Беларуссю і Турцыяй. У ходзе пасяджэння турэцкі бок прапанаваў лібералізаваць двухбаковыя і транзітныя перавозкі ў мэтах наступнага развіцця аўтамабільных грузавых перавозак", - распавялі ў Минтрансе. З улікам патрэб беларускіх міжнародных аўтамабільных перавозчыкаў квота дазволаў на 2012 год была павялічана па кожнай з катэгорый. "Атрыманне дадатковай колькасці дазволаў для беларускіх міжнародных аўтаперавозчыкаў дазволіць задаволіць іх патрэбы для працы на рынку Турцыі, а таксама павялічыць экспарт аўтатранспартных паслуг, - падкрэслілі ў прэс-службе. - Акрамя таго, бакі ўзгаднілі папярэднюю квоту дазволаў на 2013 год з улікам павелічэння на бягучы год". Таксама былі разгледжаны пытанні перавозак грузаў чыгуначным транспартам. Беларускі бок праінфармаваў турэцкіх калег аб перавозках грузаў цягніком камбінаванага транспарту "Вікінг" і адзначыў, што з падключэннем турэцкага боку да гэтага праекта аб'ём грузапатоку з Паўночнай Еўропы ў напрамку краін Міжземнамор'я і Персідскага заліва значна ўзрасце. Турэцкі бок у сваю чаргу распавёў аб новых дасягненнях у сектары аўтамабільных грузавых перавозак па ўкараненні сістэмы лічбавых тахографаў, сістэме ліцэнзавання, сістэме кантролю вагі і габарытаў, у тым ліку тэхагляду транспартных сродкаў.

БЕЛТА