Беларусь можа забяспечыць тэмп росту экспарту ў 2013 годзе вышэй за прагнозны параметр - А.Гур'янаў

26 верасня, Мінск /Кар. БЕЛТА/. Беларусь можа забяспечыць тэмп росту экспарту ў 2013 годзе вышэй за ўстаноўлены прагнозны паказчык - 115,2%. Аб гэтым паведаміў карэспандэнту БЕЛТА намеснік міністра замежных спраў Беларусі Аляксандр Гурьянов, каментуючы зацверджаныя ўказам ад 25 верасня 2012 года №418 найважнейшыя параметры прагнозу сацыяльна-эканамічнага развіцця краіны на 2013 год. "З пункту гледжання экспарту параметры рэальныя, гэта дасягальная лічба, мы ўмерана аптымістычна ставілі сабе заданне па экспарце 115,2%, - адзначыў ён. - Але мы ставім перад сабой больш істотныя задачы, каб працаваць на апярэджанне". Паводле яго слоў, раней рост экспарту быў абумоўлены шмат у чым добрай цэнавай кан'юнктурай, гэта значыць цэны раслі, але фізічныя аб'ёмы экспарту прырасталі ў меншых маштабах. Цяпер па шэрагу экспартных пазіцый ёсць добрыя тэндэнцыі росту. "Таму мы спадзяёмся, што ўстаноўленыя прагнозныя паказчыкі - гэта мінімальныя паказчыкі, якія будуць забяспечаны", - падкрэсліў ён. Паводле слоў намесніка міністра, да выканання прагнозных паказчыкаў трэба падыходзіць комплексна. "Прыняты ўказ - гэта арыенцір для дбайнай выпрацоўкі канкрэтных мерапрыемстваў на ўзроўні галін. Мы ўжо сёння вядзём працу, калі гэты глабальны паказчык па краіне выліваецца ў канкрэтныя праекты, кантракты на ўзроўні суб'ектаў гаспадарання, галін. Пад кожную гэту лічбу мы плануем адпаведна развіццё паставак", - падкрэсліў Аляксандр Гурьянов. У межах Нацыянальнай праграмы развіцця экспарту да 2015 года прадугледжана рэалізацыя шэрагу праектаў па стварэнні новых вытворчасцей у прамысловасці, у тым ліку ў дрэваапрацоўчай і іншых галінах, што забяспечыць выпуск новых відаў прадукцыі, запатрабаваных на рынку. А гэта будзе спрыяць захаванню і нарошчванню станоўчага сальда знешняга гандлю. Намеснік міністра нагадаў, што экспартная праграма прадугледжвае штогадовае планаванне праектаў, мерапрыемстваў, кантрактаў па дасягненні прагнозных паказчыкаў экспарту. У ёй закладзены канчатковыя мэты гэтага перыяду, а менавіта рост экспарту тавараў у параўнанні з 2010 годам у 2,2 раза, паслуг - у 3 разы. Па галінах, рэгіёнах, буйных вытворцах прапісаны праекты, якія будуць даваць новую экспартную прадукцыю, таксама прапісана праца па стварэнні спрыяльных умоў для выхаду на рынкі трэціх краін.

"Уступаючы ў СГА і лібералізуючы знешні гандаль, мы перш за ўсё павінны канцэнтраваць увагу на галінах і вытворчасццях, якія фарміруюць нашы канкурэнтныя перавагі, - адзначыў Аляксандр Гурьянов. - Гэта праца на базе мясцовай сыравіны, сваіх тэхналогій, выкарыстанне магчымасцей інтэграцыі. Гэта дазволіць сканцэнтраваць вытворчасць на тых галінах, дзе мы рэальна можам скласці добрую канкурэнцыю прадукцыі з трэціх краін". Яшчэ адзін напрамак - развіццё экспарту паслуг, гэта састаўная частка Нацыянальнай праграмы развіцця экспарту. За пяць гадоў экспарт паслуг павінен вырасці больш, чым экспарт тавараў, - у 3 разы. Для гэтага нарошчваецца экспарт новых відаў паслуг. "Мы актыўна падштурхоўваем і прыватны бізнес, і дзяржаўны сектар да асваення такіх відаў паслуг, як турызм, адукацыйныя, камп'ютарныя, дзелавыя паслугі, ПВТ як раз ствараўся для экспарту інавацыйных, інфармацыйных паслуг", - адзначыў прадстаўнік МЗС. Буйным праектам па экспарце будаўнічых паслуг з'яўляецца будаўніцтва ў Туркменістане горна-абагачальнага камбіната. Гэта фактычна беларускі праект, які цягне за сабой увесь комплекс паслуг - будаўнічых, інжынерных, адукацыйных (навучанне спецыялістаў у Беларусі). "Па лініі МЗС (і ўрад нас падтрымлівае) ставім пытанне аб тым, што не павінна быць чыстага экспарту тавараў, а павінна быць камбінаваная праца, гэта значыць за пастаўкай тавараў абавязкова павінна ісці паслуга, прычым комплексная, почынаючы ад транспарціроўкі экспартнага тавару, экспедыцыйнага абслугоўвання, страхавання, сэрвіснага абслугоўвання, навучання спецыялістаў. Фактычна падштурхоўваем да таго, каб мы выціскалі з нашых традыцыйных артыкулаў экспарту ўвесь комплекс, у тым ліку і экспарт паслуг", - лічыць ён. Для выканання пастаўленых задач па экспарце вызначана стратэгія, абазначаны новыя прыярытэты для росту. Беларускія тавары і паслугі прысутнічаюць у больш чым 170 краінах свету. Задача ў тым, каб новыя рынкі не развіваліся дзякуючы разавым пастаўкам, а развіваліся на доўгатэрміновай аснове. "Для сябе мы вызначылі кропкі росту - гэта шэраг краін Лацінскай Амерыкі, Паўднёва-Усходняй Азіі, для гэтых мэт у тым ліку развіваем сетку нашых замежных устаноў, якім галоўнай задачай пастаўлена прасоўванне экспарту, - паведаміў суразмоўца. - Разлічваем, што наша пасольства ў Інданезіі, якое закрывае Малайзію, Сінгапур, Аўстралію, актывізуецца і там будзе прарыў па экспартных пазіцыях".

БЕЛТА