Беларусь разлічвае на палітычную мудрасць амерыканскага боку і перагляд рашэння аб выхадзе з Дагавора па адкрытым небе.
Беларусь разлічвае на палітычную мудрасць амерыканскага боку і перагляд рашэння аб выхадзе з Дагавора па адкрытым небе. Пра гэта гаворыцца ў заяве Міністэрства замежных спраў у сувязі з выхадам ЗША з Дагавора па адкрытым небе, і паведамляе БЕЛТА са спасылкай на прэс-службу МЗС.
"22 лістапада ўступіла ў сілу рашэнне ЗША аб выхадзе з Дагавора па адкрытым небе (ДОН). Рэспубліка Беларусь з глыбокім шкадаваннем успрыняла гэты крок амерыканскага боку, - гаворыцца ў заяве. - Распрацаваны як раз па ініцыятыве ЗША ў першыя гады пасля заканчэння халоднай вайны ДОН застаецца адным з найбольш значных і эфектыўна дзеючых юрыдычна абавязковых ваенна-палітычных механізмаў на прасторы ад Ванкувера да Уладзівастока, які забяспечвае беспрэцэдэнтны ўзровень празрыстасці і прадказальнасці паміж дзяржавамі-ўдзельніцамі ў ваеннай сферы".
У заяве адзначаецца, што чацвёртая канферэнцыя па разглядзе выканання дагавора, якая прайшла 7-9 кастрычніка гэтага года, пацвердзіла запатрабаванасць ДОН як унікальнай меры даверу і неад'емнага элемента сістэмы еўраатлантычнай бяспекі.
"ЗША былі адным з ключавых удзельнікаў дагавора і ўносілі істотны ўклад у яго паспяховае выкананне. Выхад Вашынгтона з ДОН падрывае жыццяздольнасць дагавора, прывядзе да далейшага росту недаверу і ваенна-палітычнай напружанасці, - гаворыцца ў дакуменце. - Сур'ёзны ўрон наносіцца архітэктуры еўраатлантычнай бяспекі і інструментарыю кантролю над узбраеннямі".
"Разлічваем, што амерыканскае кіраўніцтва праявіць палітычную мудрасць і гэта рашэнне будзе перагледжана ў бліжэйшы час. Перакананыя, што вяртанне ЗША ў супольнасць "адкрытага неба" не толькі ўмацуе бяспеку ўсіх дзяржаў - удзельніц ДОН, але і станоўча паўплывае на аднаўленне атмасферы даверу на еўраатлантычнай прасторы", адзначаецца ў заяве.