Беларусь падчас крызісу захавала макраэканамічную стабільнасць і давер людзей - А.Рубінаў
20.7.20100 праглядаў
20 ліпеня, /Кар. БЕЛТА/. У перыяд глабальнага фінансавага і эканамічнага крызісу ўсе краіны адчулі на сабе яго негатыўны ўплыў. Беларусь таксама не змагла пазбегнуць адмоўнай дынамікі вытворчасці, аднак здолела захаваць макраэканамічную стабільнасць, давер людзей і спакой у грамадстве. Пра гэта заявіў 19 ліпеня старшыня Савета Рэспублікі Нацыянальнага сходу Беларусі Анатоль Рубінаў на III Сусветнай канферэнцыі спікераў парламентаў падчас агульных дэбатаў на тэму "Парламенты ў свеце крызісу: забеспячэнне глабальнай дэмакратычнай падсправаздачнасці і адказнасці ў інтарэсах усеагульнага дабра". Форум праходзіць па 21 ліпеня ў Жэневе, паведамілі карэспандэнту БЕЛТА ва ўпраўленні інфармацыі сакратарыята Савета Рэспублікі.
Асаблівая роля ў вырашэнні задач па пераадоленні крызісу легла на парламентарыяў, адзначыў спікер. Дзякуючы іх намаганням быў прыняты шэраг законаў, накіраваных перш за ўсё на лібералізацыю ўмоў гаспадарання, стымуляванне прадпрымальніцкай ініцыятывы грамадзян і дзяржаўную падтрымку насельніцтва. У выніку прынятых мер Беларусь па выніках рэйтынгу штогадовай справаздачы Сусветнага банка "Вядзенне бізнесу" ў 2009 годзе паднялася з 82-га на 58-е месца. Як падкрэсліў Анатоль Рубінаў, пастаўлена яшчэ больш важная задача - увайсці па гэтым параметры ў трыццатку першых краін.
Неабходнай умовай захавання стабільнасці ў грамадстве з'яўляецца забеспячэнне цеснага дыялогу ўлады з грамадзянамі, падкрэсліў у выступленні кіраўнік верхняй палаты беларускага парламента. Найбольш эфектыўнай формай работы членаў Савета Рэспублікі з насельніцтвам з'яўляецца правядзенне асабістага прыёму грамадзян і разгляд іх зваротаў. Гэта дазваляе парламентарыям быць у курсе патрэб грамадства, атрымліваць інфармацыю аб стане спраў на месцах, выяўляць балючыя кропкі і прымаць неабходныя меры для аператыўнага вырашэння пытанняў, якія хвалююць людзей.
Найважнейшым складнікам дзейнасці Савета Рэспублікі як органа тэрытарыяльнага прадстаўніцтва Анатоль Рубінаў назваў узаемадзеянне з рэгіёнамі. Істотную ролю ў гэтым, а таксама ў каардынацыі дзейнасці мясцовых Саветаў дэпутатаў рознага ўзроўню, па яго словах, адыгрывае Савет па ўзаемадзеянні органаў мясцовага самакіравання пры Савеце Рэспублікі. Гэтая дзейнасць суправаджаецца шырокай публічнай кампаніяй, анансуецца і асвятляецца ў СМІ. Акрамя таго, сенатары рэгулярна выкарыстоўваюць прэсу, тэлебачанне і Інтэрнэт для інфармавання аб сваёй дзейнасці і планах на будучыню, тлумачэння прымаемых парламентам рашэнняў. Такі механізм узаемадзеяння "Парламент - грамадзянская супольнасць - мясцовая ўлада - урад - СМІ" дазволіў стварыць дзейсную працэдуру дыялогу народа і ўлады, забяспечыўшы дакладную сістэмную працу парламентарыяў з насельніцтвам, заснаваную на прынцыпах адказнасці і адкрытасці.
Гаворачы аб дзейнасці нацыянальных парламентаў, Анатоль Рубінаў адзначыў: "Мы не павінны забываць аб адказнасці парламентарыяў перад сусветнай супольнасцю". Прымаючы рашэнні, парламентарыі павінны заўсёды ўлічваць сусветныя тэндэнцыі і сусветны досвед. У сувязі з гэтым вельмі важным уяўляецца канструктыўнае супрацоўніцтва парламентаў усіх краін і асаблівая місія ААН у яго развіцці. Сярод апошніх ініцыятыў Беларусі ў ААН спікер згадаў фарміраванне глабальнага партнёрства па барацьбе з гандлем людзьмі, павышэнне даступнасці тэхналогій выкарыстання новых і аднаўляльных крыніц энергіі і інш. На яго думку, міжнародная парламенцкая супольнасць павінна паслядоўна выступаць за ўзмацненне ролі ААН у вырашэнні глабальных выклікаў сучаснасці.
Старшыня верхняй палаты парламента Беларусі выказаў упэўненасць у тым, што Міжпарламенцкі саюз, які аб'ядноўвае ў цяперашні час парламентарыяў 155 дзяржаў свету, з'яўляецца ўнікальнай пляцоўкай шматбаковага парламенцкага дыялогу. Яго дзейнасць і надалей павінна быць накіравана на выпрацоўку ўзгодненых падыходаў, якія маглі б забяспечыць мірнае і ўзаемавыгаднае развіццё ўсіх краін і пазбегнуць развіцця крызісных з'яў у свеце.У гэты ж дзень старшыня Савета Рэспублікі правёў сустрэчы са старшынёй Лок Сабха (Народнай палаты) парламента Індыі Мейрай Кумар, старшынёй Народнага сходу Балгарыі Цецкай Цачавай і старшынёй Сената парламента Казахстана Касымам Жамартам Такаевым. Былі разгледжаны пытанні актывізацыі двухбаковага гандлёва-эканамічнага і міжпарламенцкага ўзаемадзеяння, а таксама каардынацыі пазіцый у міжнародных форумах.
У працы III Сусветнай канферэнцыі спікераў парламентаў таксама прымаюць удзел старшыня Палаты прадстаўнікоў Нацыянальнага сходу Беларусі Уладзімір Андрэйчанка і старшыня Пастаяннай камісіі Савета Рэспублікі па міжнародных справах і нацыянальнай бяспецы Ніна Мазай (у якасці кіраўніка дэлегацыі Парламенцкага сходу Саюза Беларусі і Расіі).
БЕЛТА