8 чэрвеня, Мінск /Кацярына Нячаева - БЕЛТА/. Беларускія дэпутаты працягваюць працаваць над кардынальным спрашчэннем падатковай сістэмы. Прапановы, якія для гэтага неабходна ўнесці ў заканадаўства, парламентарыі маюць намер абмеркаваць на выязным пасяджэнні Пастаяннай камісіі Палаты прадстаўнікоў па бюджэце, фінансах і падатковай палітыцы. Яно будзе праходзіць 9 і 10 чэрвеня на базе прадпрыемстваў Гродна і Слоніма. Пра гэта карэспандэнту БЕЛТА паведаміў старшыня профільнай камісіі Аляксандр Антонаненка. Па плане законатворчай дзейнасці, у гэтым годзе чакаецца распрацоўка законапраекта аб унясенні прапаноў у Падатковы кодэкс. У прыватнасці, вывучаецца магчымасць у 2012 годзе дазволіць пераносіць страты на прыбыткі будучых перыядаў, павялічыць тэрміны дакументальнага пацвярджэння вывазу тавараў за межы Беларусі, перагледзець падставы спагнання штрафаў за здзяйсненне адміністрацыйных правапарушэнняў у сферы падатковага заканадаўства. "Калі раней у краіне стаяла задача павелічэння аб'ёмаў вытворчасці, то зараз асноўная мэта - інавацыйны шлях развіцця. Таму абмяркоўваецца пытанне па зніжэнні стаўкі падатку на прыбытак. Гэта зразумела: падатак на прыбытак - асноўная крыніца ўнутраных інвестыцый для прадпрыемства. Чым больш стаўка падатку на прыбытак, тым менш укладваецца ў развіццё прадпрыемства", - сказаў дэпутат. Для вывучэння і сістэматызацыі прапаноў па змене падатковага заканадаўства пры Савеце міністраў дзейнічае рабочая група на чале з віцэ-прэм'ерам Сяргеем Румасам. Актыўны ўдзел у яе рабоце прымаюць дэпутаты Палаты прадстаўнікоў. Каб абмеркаваць дадатковыя меры па спрашчэнні падатковай сістэмы, парламентарыі арганізавалі выязное пасяджэнне камісіі. "На яго запрошаны кіраўнікі эканамічных службаў, галоўныя бухгалтары, кіраўнікі прадпрыемстваў. Хацелася б абмеркаваць са спецыялістамі-практыкамі, наколькі карысныя прапанаваныя прапановы заканадаўства і ці будуць яны мець станоўчы ўплыў на эканоміку прадпрыемства", - растлумачыў Аляксандр Антонаненка.