20 снежня, Мінск /Кар. БЕЛТА/. Беларускія сенатары сёння на пасяджэнні сесіі Савета Рэспублікі адобрылі законапраект "Аб рэспубліканскім бюджэце на 2012 год" і папраўкі ў Падатковы кодэкс, перадае карэспандэнт БЕЛТА. Як адзначыў журналістам старшыня Пастаяннай камісіі па эканоміцы, бюджэце і фінансах Савета Рэспублікі Вадзім Попаў, галоўная задача бюджэту – забяспечыць фінансаванне ўсіх напрамкаў, прадугледжаных праграмай сацыяльна-эканамічнага развіцця краіны. Кажучы пра асаблівасці бюджэту на будучы год, Вадзім Попаў адзначыў, што больш рэсурсаў будзе накіравана на аб'екты будаўніцтва з высокай ступенню гатоўнасці. Ён сказаў, што фінансавацца будуць найбольш значныя вытворчасці, якія дазволяць максімальна вырашаць пытанні экспарту. Вадзім Попаў таксама адзначыў, што ў будучым годзе на экспарт павінна пайсці не менш за 65% вырабленай прадукцыі. Неабходна таксама вырашаць галоўную задачу – выхаду на станоўчае сальда ў $1,5 млрд. "Будучы бюджэт бездэфіцытны ў першую чаргу таму, што мы можам дазволіць сабе марнаваць толькі тое, што заробім", - падкрэсліў Вадзім Попаў. У 2012 годзе захаваецца сацыяльная накіраванасць расходаў бюджэту. Значную частку ў бюджэце складуць расходы на аплату працы, выплаты пенсій, стыпендый, дапамог, іншыя выплаты, сродкі на выкананне дзяржаўных сацыяльных стандартаў. Таксама прыярытэтамі бюджэтнай палітыкі вызначаны ахова здароўя і адукацыя. Фарміраванне рэспубліканскага бюджэту на будучы год праведзена на бездэфіцытнай аснове. Мерапрыемствы ў галіне падатковай палітыкі, улічаныя ў праекце бюджэту на 2012 год, закліканы палепшыць адміністраванне падаткаў, адаптаваць стаўкі да новых цэнавых умоў, павысіць збіральнасць даходаў бюджэту, паменшыць падатковую нагрузку на малы і сярэдні бізнес, стымуляваць вытворчасць высокатэхналагічных тавараў.