Навукоўцы Беларуска-Расійскага ўніверсітэта (Магілёў) распрацавалі электронны гід для грамадскага транспарту на базе тэхналогій GPS, GLONAS. Пра гэта паведаміў карэспандэнту БЕЛТА навуковы кіраўнік праекта, загадчык кафедры электратэхнікі і электронікі ўстановы адукацыі Фёдар Трухачоў.
Навукоўцы Беларуска-Расійскага ўніверсітэта (Магілёў) распрацавалі электронны гід для грамадскага транспарту на базе тэхналогій GPS, GLONAS. Пра гэта паведаміў карэспандэнту БЕЛТА навуковы кіраўнік праекта, загадчык кафедры электратэхнікі і электронікі ўстановы адукацыі Фёдар Трухачоў.
Гэта сукупнасць інфармацыйных экранаў, мабільных дадаткаў і праграмнага забеспячэння, якая дазваляе ў аўтаматычным рэжыме перадаваць візуальную і гукавую інфармацыю. Яна палягчае і спрашчае працу кіроўцы, паколькі працэс перадачы інфармацыі аб прыпыначных пунктах аўтаматызаваны, а пасажырам дае магчымасць убачыць і адсачыць маршрут руху транспартнага сродку, пазнаёміцца з аб'ектамі, размешчанымі на шляху следавання.
"Ідэя стварэння электроннага гіда з'явілася напярэдадні чэмпіянату свету па хакеі ў Беларусі, каб турысты маглі ў грамадскім транспарце знаёміцца па дарозе з горадам, яго мінулым і знакавымі аб'ектамі, лепш планавалі маршрут і рацыянальна выкарыстоўвалі час знаходжання ў краіне. Толькі для ўвасаблення ідэі ў рэальнасць спатрэбілася два з лішнім гады, але сваю актуальнасць яна не страціла. Электронны гід прызваны дапамагчы развіць інфраструктуру турызму, павысіць ступень інфарматызацыі і імідж беларускіх гарадоў, а для грамадскага транспарту - гэта яшчэ і сучасная рэкламная пляцоўка з патэнцыйна шырокай аўдыторыяй", - адзначыў навуковец.
Новая сістэма ўстаноўлена і праходзіць тэставыя выпрабаванні на тралейбусе №77, які рухаецца па маршруце №2 практычна праз увесь горад. Яна ўяўляе сабой планшэт і інфармацыйны экран. Першы знаходзіцца ў кіроўцы, а другі - у салоне тралейбуса. Кіроўцу дастаткова ўключыць планшэт і выбраць маршрут руху. Сістэма ў аўтаматычным рэжыме будзе арыентавацца ў прасторы і перадаваць візуальную карцінку на экран. На экране адлюстраваны маршрут руху ў выглядзе лініі з прыпынкамі (кропкамі). Чырвоная кропка - бягучая станцыя, мігаючая чырвоная - наступная станцыя. Інфармацыя на экран перадаецца па WI-FI з галоўнай прылады. Праграмнае забеспячэнне аўтаматычна (па GPS дадзеных) вызначае месцазнаходжанне тралейбуса (аўтобуса) і візуальна падсвячвае бягучы і наступны прыпынкі.
Непасрэдна на прыпынках на экран буйным шрыфтам выводзіцца назва прыпынку (на некалькіх мовах). На перагонах паміж станцыямі на экран можа быць выведзена відэаінфармацыя аб культурных і архітэктурных аб'ектах, размешчаных паблізу прыпынкаў маршруту, а таксама інфармацыя аб гасцініцах, спартыўных збудаваннях, вакзалах і інш. Акрамя таго, рэкламная інфармацыя (крамы, кафэ, рэстараны) можа быць паказана ў прывязцы да мясцовасці і часу. Напрыклад, на тралейбусным маршруце №2 на экран выведзена штотыднёвая афіша Магілёўскага абласнога драматычнага тэатра, а таксама прагноз надвор'я, курсы валют.
Гук перадаецца з дапамогай FM дыяпазону, яго можна пачуць, падключыўшы навушнікі практычна да любога мабільнага тэлефона, з убудаваным FM прыёмнікам.
"Інфармацыя аб месцазнаходжанні кожнага транспартнага сродку можа перадавацца на дыспетчарскі пункт у аўтапарку ў рэжыме рэальнага часу праз інтэрнэт. Маецца таксама магчымасць перадаваць дадзеную інфармацыю на смартфоны карыстальнікаў. Акрамя таго, сістэма па сярэдняй хуткасці руху аўтаматычна збірае інфармацыю аб дарожнай абстаноўцы ў горадзе, што можа быць карысным для экстранных службаў", - сказаў Фёдар Трухачоў.
Распрацоўкай магілёўцаў зацікавіліся не толькі ў Магілёве, ёсць прапановы па супрацоўніцтве яе ўкаранення ў іншых гарадах краіны, а таксама суседніх краінах.
Навіны Беларусі (БЕЛТА)